Экс-дырэктар Скідзельскага цукровага завода памёр у калоніі ад раку — СМІ

Рэдакцыя Reform.news · 7 мая 2026, 11:21

https://reform.news/be/jeks-dyrjektar-skidzelskaga-cukrovaga-zavoda-pamjor-u-kalonii-ad-raku-smi/

Былы дырэктар Скідзельскага цукровага завода Дзмітрый Ягораў, асуджаны па цукровай справе, памёр у калоніі, паведамляе «Флагшток» са спасылкай на аднаго з былых палітвязняў.

У 2021 годзе Ягорава прысудзілі да 11 гадоў пазбаўлення волі за атрыманне хабару. Ён адбываў тэрмін у калоніі №1 у Наваполацку. Паводле інфармацыі крыніцы, у Ягорава быў рак, яго накіроўвалі ў турэмную рэспубліканскую бальніцу.

«Не выпусцілі нават перад смерцю, ведаючы, што ён памірае. Таму што з нявыплачанымі пазовамі не вызваляюць, хоць паводле закона смяротна хворых могуць выпускаць», — расказаў выданню суразмоўца.

Паводле яго даных, цела павінны забраць з калоніі 7 мая.