Грамадзяніна Літвы затрымалі ў Беларусі па падазрэнні ў шпіянажы

Рэдакцыя Reform.news · 12 мая 2026, 15:33

https://reform.news/be/gramadzjanina-litvy-zatrymali-belarusi-pa-padazrjenni-shpijanazhy/

КДБ затрымаў у Беларусі грамадзяніна Літвы Міраславаса Троцкіса. Сцвярджаецца, што Троцкіс быў агентам літоўскіх спецслужбаў з пазыўным «Рынга».

Дзяржаўны тэлеканал АНТ назваў Троцкіса былым літоўскім сілавіком. Ён прыязджаў у Беларусь пад выглядам аднаўлення бацькоўскага дома, нібыта збіраў інфармацыю пра стратэгічныя і вайсковыя аб’екты і начаваў у сваякоў для канспірацыі.

Сцвярджаецца, што Троцкіс знаходзіўся пад назіраннем беларускай контрразведкі з моманту ўезду ў Беларусь.

На відэа паказаны момант затрымання Троцкіса на дарозе і фрагмент допыту, дзе мужчына просіць прабачэння за тое, што «нанёс шкоду».