ЕГУ, МКС, інтэграцыя беларусаў. Бяляцкі сустрэўся з прэм’ер-міністрам Літвы

Рэдакцыя Reform.news · 27 красавіка 2026, 13:01

https://reform.news/be/egu-mks-intjegracyja-belarusa-bjaljacki-sustrje-sja-z-prjem-er-ministram-litvy/

Нобелеўскі лаўрэат, кіраўнік праваабарончага цэнтра “Вясна” Алесь Бяляцкі сустрэўся з прэм’ер-міністрам Літвы Інгай Ругінене.

Як паведамляе “Вясна”, Бяляцкі выказаў падзяку за салідарнасць з беларускімі праваабарончымі і недзяржаўнымі арганізацыямі. Ён падкрэсліў важнасць далейшага выкарыстання механізмаў Міжнароднага крымінальнага суда ў дачыненні да падзей у Беларусі. Нагадаем, Літва падала зварот у МКС супраць Аляксандра Лукашэнкі.

Таксама асаблівая ўвага падчас сустрэчы надавалася ціску на ЕГУ, сітуацыі з палітычнымі рэпрэсіямі ў Беларусі. Акрамя таго, ішла гаворка пра пытанні працы прафсаюзаў і ўзаемадзеяння з Міжнароднай арганізацыяй працы, інтэграцыю беларусаў, якія вымушана пераехалі ў Літву, эфектыўнасць санкцыйнай палітыкі.