Контейнерный поезд из Беларуси в Китай. Фото: rw.by
Беларускі знешні гандаль таварамі застаецца дэфіцытным. Аднак памер гэтага дэфіцыту скараціўся ў студзені-лютым у параўнанні з аналагічным перыядам мінулага года, сведчаць даныя Белстата.
Беларускі экспарт тавараў у студзені-лютым вырас на 16,6% да 6,7 млрд долараў. Імпарт пры гэтым павялічыўся на 11,7% да 7,59 млрд долараў. Дэфіцыт знешняга гандлю склаў 888,3 млн долараў, што на 15,4% менш, чым у мінулым годзе. У студзені-лютым 2025 года дэфіцыт гандлю таварамі перавышаў 1 млрд долараў.
Экспарт тавараў у краіны СНД у студзені-лютым вырас на 21,2% да 4,88 млрд долараў, імпарт з гэтых краін павялічыўся на 15,5% да 4,52 млрд долараў. Прафіцыт у гандлі з краінамі СНД склаў 356,3 млн долараў, павялічыўшыся ў параўнанні з мінулым годам у тры разы.
У гандлі з краінамі па-за СНД беларускі экспарт за два месяцы вырас на 5,9% да 1,82 млрд долараў, а імпарт — на 6,4% да 3,06 млрд долараў. Імпарт перавысіў экспарт на 1,24 млрд долараў, што на 7,2% больш, чым год таму.
У лютым беларускі экспарт тавараў вырас на 14,6% да 3,44 млрд долараў, а імпарт — на 16% да 4,13 млрд долараў. Лютаўскі дэфіцыт знешняга гандлю таварамі склаў 686,1 млн долараў, што на 23,9% больш, чым год таму.
У гандлі з краінамі СНД у лютым экспарт перавысіў імпарт на 81,9 млн долараў, што ў два разы больш, чым год таму. Пры гэтым беларускі экспарт тавараў у краіны СНД вырас на 18% да 2,52 млрд долараў, а імпарт — на 16,2% да 2,44 млрд долараў.
Беларускі экспарт тавараў у краіны за межамі СНД у лютым вырас на 6,2% да 919,2 млн долараў. Імпарт пры гэтым павялічыўся на 15,7% да 1,69 млрд долараў. Дэфіцыт гандлю таварамі з краінамі па-за СНД вырас за год на 29,7% да 768 млн долараў.