Ціханоўская заклікала беларусаў галасаваць на выбарах у Каардынацыйную раду

Рэдакцыя Reform.news · 17 красавіка 2026, 10:22

https://reform.news/be/cihano-skaja-zaklikala-belarusa-galasavac-na-vybarah-u-kaardynacyjnuju-radu/

Святлана Ціханоўская звярнулася да беларусаў з заклікам прыняць удзел у выбарах у Каардынацыйную раду чацвёртага склікання, якія пройдуць з 11 па 17 мая. Для ўдзелу зарэгістраваны 9 спісаў. На 80 месцаў у беларускім протапарламенце прэтэндуюць 174 чалавекі.

У сваім відэазвароце Ціханоўская падзякавала ўсім, хто працягвае падтрымліваць Беларусь, і заявіла, што перамены пачынаюцца з удзелу.

«З 11 па 17 мая ў нас ёсць магчымасць зрабіць яшчэ адзін важны крок — паказаць, што грамадзянскае грамадства жыве, дзейнічае і мае свой голас», — сказала палітык.

Яна заклікала ўважліва вывучыць кандыдатаў і іх праграмы перад галасаваннем.

«Людзі, якія вырашылі балатавацца ў Каардынацыйную раду, зрабілі ўсвядомлены выбар. Яны разумелі, з чым сутыкнуцца: ціск, пагрозы, рызыкі. І ўсё роўна яны выбралі балатавацца. І гэта выклікае шчырую павагу», — адзначыла лідар дэмсіл.

«Усвядомлены выбар пачынаецца з разумення. Чым лепш мы ведаем, за каго і за што галасуем, тым мацней будзе наша агульная пазіцыя. Менавіта цяпер час чытаць, параўноўваць, унікаць у сутнасць і вызначацца — каб наш голас быў не проста голасам, а адказным выбарам для будучыні Беларусі», – дадала яна.