Ціханоўская возьме ўдзел у саміце Еўрапейскай палітычнай супольнасці

Рэдакцыя Reform.news · 11 лістапада 2026, 10:47

https://reform.news/be/cihano-skaja-vozme-dzel-u-samice-e-rapejskaj-palitychnaj-supolnasci/

Святлана Ціханоўская возьме ўдзел у саміце Еўрапейскай палітычнай супольнасці, які адбудзецца ў Ірландыі.

“Падчас сустрэч з еўрапейскімі лідарамі і міжнароднымі партнёрамі я прадстаўлю нашы ключавыя прыярытэты.

Да іх адносяцца: уключэнне пытання Беларусі ў парадак дня мірных перамоваў, супрацьдзеянне расійскім гібрыдным пагрозам і пагрозам суверэнітэту Беларусі, узмацненне падтрымкі Украіны, а таксама захаванне еўрапейскага адзінства.

Акрамя таго, я заклічу нашых партнёраў прытрымлівацца прынцыповай санкцыйнай палітыкі ў дачыненні да рэжыму Лукашэнкі і працягваць працу, накіраваную на вызваленне ўсіх палітвязняў”, – расказала Ціханоўская ў Х пра свае планы.

Еўрапейская палітычная супольнасць — міжурадавая арганізацыя, заснаваная для палітычных і стратэгічных дыскусій пра будучыню Еўропы, прапанаваная прэзідэнтам Францыі Эманюэлем Макронам у маі 2022 года. Яна ўключае ў сябе краіны еўрапейскага кантынента, за выключэннем Беларусі і Расіі. Саміты ЕПС адбыліся ў Чэхіі, Малдове, Іспаніі, Вялікабрытаніі, Венгрыі, Албаніі і Даніі.

Сёлета адна сустрэча ЕПС ужо адбылася ў Арменіі. У Ірландыі яна пройдзе ў рамках ірландскага старшынства ў ЕС.

Святлана Ціханоўская рэгулярна бярэ ўдзел у сустрэчах ЕПС.