Фото: sk.gov.by
Следчыя ўстанавілі абставіны гібелі 5 чалавек у страшным ДТЗ, якое адбылося 25 жніўня мінулага года на трасе М-1.
У той дзень на 171-м кіламетры вадзіцель BMW, рухаючыся ў напрамку Брэста, не справіўся з кіраваннем. Аўтамабіль занесла, ён выехаў на сустрэчную паласу руху, дзе ўрэзаўся ў Volkswagen пад кіраваннем 41-гадовага мужчыны, а пасля — у сядзельны цягач Citrak, за рулём якога быў 39-гадовы вадзіцель.
У выніку аварыі на месцы загінулі 20-гадовы вадзіцель BMW і яго 18-гадовы пасажыр, а таксама вадзіцель Volkswagen, яго 42-гадовая жонка і 18-гадовы сын. Дзевяцігадовая дачка вадзіцеля Volkswagen выжыла і атрымала менш цяжкія цялесныя пашкоджанні. Вадзіцель вялікагруза не пацярпеў.
Было ўстаноўлена, што аварыя адбылася на левай паласе руху ў бок Мінска. У момант ДТЗ ішоў дождж, дарожнае пакрыццё было мокрым.
У межах расследавання былі дапытаныя сведкі, вывучаныя запісы камер відэаназірання, праведзеныя судовыя экспертызы і следчыя эксперыменты. Высветлілася, што кіроўца і пасажыр BMW не былі прышпілены рамянямі бяспекі, а аўтамабіль меў тэхнічную няспраўнасць — нераўнамерны знос шын задняй восі з агаленнем індыкатараў. Хуткасць руху BMW перад заносам перавышала 140 км/г пры дазволеных 120 км/г.
Следства прыйшло да высновы, што непасрэднай прычынай трагедыі сталі дзеянні вадзіцеля BMW, які кіраваў тэхнічна няспраўным аўтамабілем, перавозіў пасажыра з непрышпіленым рамянём бяспекі, парушыў хуткасны рэжым і не ўлічыў дарожныя і надворныя ўмовы і стан аўтамабіля. Гэта прывяло да страты кантролю над аўтамабілем, заносу і выезду на сустрэчную паласу. Гэтыя абставіны знаходзяцца ў прамой прычынна-выніковай сувязі з наступствамі, паведамляе прэс-служба Следчага камітэта.
Па выніках расследавання крымінальная справа ў дачыненні да вадзіцеля BMW спыненая ў сувязі з яго смерцю.