Иллюстративное фото: pixabay.com
Беларускія праваабарончыя арганізацыі запатрабавалі перагледзець прысуды 20 былым палітычным зняволеным, адмяніць іх і поўнасцю рэабілітаваць асуджаных. Сумесная заява апублікавана сёння, 14 жніўня, на сайце праваабарончага цэнтра «Вясна».
Праваабаронцы заяўляюць, што пералічаныя людзі былі пазбаўленыя волі за рэалізацыю права на свабоду выказвання меркавання, мірных сходаў і асацыяцый. Гаворка ідзе пра пераслед, звязаны ў тым ліку з пратэстамі пасля прэзідэнцкіх выбараў 2020 года, распаўсюджваннем інфармацыі і антываеннымі выказваннямі.
Аўтары называюць палітычна матываваным пераслед Георгія Белавусава, Юрыя Берната, Івана Бурлікі, Віктара Вярбіцкага, Яўгена Гомельскага, Аляксандра Дзмітрука, Уладзіміра Кандрацюка, Алега Каспяровіча, Мікалая Кісялёва, Івана Краўцова, Мікіты Ломскага, Юрыя Мядзведзіка, Аляксандра Паповіча, Таццяны Сухавей, Сяргея Сухаварава, Кацярыны Суславай, Ангеліны Тамковіч, Ігара Фамянка, Ігара Фогелева і Георгія Чаўшніка.
Праваабаронцы падкрэсліваюць, што вызваленне чалавека з-пад варты або пасля адбыцця пакарання само па сабе не ліквідуе наступстваў, якія былі выкліканыя палітычна матываваным пераследам. Яны патрабуюць ад беларускіх уладаў перагледзець законнасць утрымання названых людзей пад вартай і ў зняволенні, адмяніць вынесеныя ім прысуды, правесці поўную рэабілітацыю і кампенсаваць прычыненую ім шкоду. Аўтары таксама заклікаюць спыніць палітычныя рэпрэсіі ў Беларусі.