Фото: Reform.by
Беларускія медыкі ў выгнанні запускаюць праект «Раёнка» — анлайн-паліклініку. Яна разлічана на ўразлівыя групы — палітвязняў, шматдзетныя сем’і і бацькоў-адзіночак, а таксама людзей з невялікіх гарадоў і вёсак без доступу да якаснай медыцынскай дапамогі. Пра праект расказаў Станіслаў Салавей, намеснік прадстаўніка АПК па сацыяльнай палітыцы, на канферэнцыі «Новая Беларусь».
«„Раёнка“ — гэта, па сутнасці, анлайн-паліклініка, разлічаная на ўразлівыя групы. Пад імі мы маем на ўвазе не толькі палітвязняў, шматдзетныя сем’і і бацькоў-адзіночак. Мы таксама адносім да іх людзей, якія жывуць за межамі буйных гарадоў — у невялікіх гарадах і вёсках, дзе часта ўзнікаюць праблемы з даступнасцю і якасцю медыцынскай дапамогі», — патлумачыў Салавей.
У «Раёнцы» будуць працаваць толькі медыкі, якія з’ехалі з Беларусі. Першых пацыентаў плануюць прымаць у наступным месяцы.
Асаблівая ўвага надаецца бяспецы як лекараў, так і пацыентаў.
«І пацыенты, і лекары будуць ананімнымі. Іх верыфікацыяй будуць займацца розныя людзі: медыкаў будуць верыфікаваць адны спецыялісты, а пацыентаў, якія знаходзяцца ў Беларусі, — іншыя. Гэта робіцца дзеля іх абароны, таму што мы разумеем: дзяржава вельмі нервова рэагуе, калі мы спрабуем паказаць, што з медыцынскай дапамогай у краіне нешта не так», — расказаў Салавей.