Беларускія дзяржорганы і арганізацыі атрымалі з Расіі каля мільёна рублёў у рамках рэалізацыі пагаднення з РФ па выканаўчых дакументах, паводле якіх спагнальнікамі з’яўляюцца дзяржаўныя органы і бюджэтныя арганізацыі.
“За пяць месяцаў прымянення на практыцы пагаднення ўжо забяспечана паступленне на рахунак беларускага Міністэрства юстыцыі больш за 2,3 тыс. плацяжоў на агульную суму каля 28 млн расійскіх рублёў, што складае каля 1 млн беларускіх рублёў”, – сказаў міністр юстыцыі Яўген Каваленка, прадстаўляючы ў Палаце прадстаўнікоў законапраект аб ратыфікацыі названага пагаднення, перадае БелТА.
У далейшым Мінюст пералічыць сродкі атрымальнікам. Расійскае заканадаўства прадугледжвае, што спагнаныя грошы могуць пералічвацца толькі на рахунак спагнальніка. Пагадненне прадугледжвае, што ў выпадку беларускіх дзяржорганаў і бюджэтных арганізацый сродкі могуць залічвацца на рахунак Міністэрства юстыцыі, адкрыты ў РФ.