Беларускі стварылі фальшывыя IT-кампаніі для працаўладкавання мігрантаў

Рэдакцыя Reform.news · 8 чэрвеня 2026, 15:44

https://reform.news/be/belaruski-stvaryli-falshyvyja-it-kampanii-dlja-praca-ladkavannja-migranta/

МУС раскрыла незаконную схему міграцыі ў Беларусь. Замежнікі паводле дакументаў працавалі праграмістамі, а насамрэч займаліся анлайн-казіно і порнабізнесам.

Супрацоўнікі ГУБАЗіК, АМАПа і спецпадраздзялення па барацьбе з тэрарызмам «Алмаз» затрымалі трох жанчын, якія дапамагалі грамадзянам краін Блізкага Усходу нелегальна ўязджаць і знаходзіцца ў Беларусі.

Дзве 53-гадовыя жанчыны стварылі IT-кампаніі і падавалі ў дзяржаўныя ўстановы падробленыя дакументы аб працаўладкаванні замежнікаў на пасады інжынераў-праграмістаў. Насамрэч мігранты займаліся прасоўваннем анлайн-казіно для сваіх землякоў, бо работа казіно забароненая на іх радзіме. Акрамя гэтага, для рэкламы бізнесу і павелічэння праглядаў стрымаў замежнікі арганізавалі студыю па вырабе эратычных матэрыялаў. Яна размяшчалася ў адным з дамоў у Мінскім раёне.

Яшчэ адна затрыманая, 21-гадовая мінчанка, знаходзіла кліентаў. У гэтым ёй дапамагалі 28- і 33-гадовыя жыхары блізкаўсходняга рэгіёна, паведамляе МУС.

Праз гэтую схему не менш за 40 замежнікаў атрымалі візы і дазволы на часовае пражыванне ў Беларусі. За свае паслугі абвінавачаныя бралі ад 1500 да 2000 долараў з чалавека.

Узбуджаная крымінальная справа за арганізацыю незаконнай міграцыі. Замежнікаў прымусова вышлюць з краіны. Устанаўліваюцца іншыя ўдзельнікі злачыннай дзейнасці.