Беларуса і паляка затрымалі ў Польшчы за кантрабанду цыгарэт метэазондамі

Рэдакцыя Reform.news · 9 красавіка 2026, 11:10

https://reform.news/be/belarusa-i-paljaka-zatrymali-polshchy-za-kantrabandu-cygarjet-metjeazondami/

Паліцыя ў Беластоку затрымала 24-гадовага паляка і 36-гадовага беларуса. Яны абвінавачваюцца ў кантрабандзе цыгарэт з Беларусі ў Польшчу з дапамогай метэазондаў.

Як заяўляе паліцыя, затрыманыя вялі дзейнасць у складзе злачыннай групы і зрабілі яе пастаяннай крыніцай даходу. Яны ўдзельнічалі ў набыцці як паветраных шароў, так і ў набыцці цыгарэт. Таксама яны прымалі прыляцелыя цыгарэты на польскім баку і перавозілі іх у месцы захоўвання для далейшага перапродажу, паведамляе паліцыя Падляскага ваяводства Польшчы.

Паліцыя канфіскавала больш за 7500 пачкаў цыгарэт розных марак, якія захоўваліся ў гаражы, аўтамабілі і па месцы жыхарства аднаго з затрыманых. Таксама былі канфіскаваныя больш за 20 тысяч злотых і 20 тысяч долараў.

Мужчынам прад’яўлена ў агульнай складанасці восем абвінавачанняў. Ім пагражае да 8 гадоў пазбаўлення волі.