Іранскую студэнтку арыштавалі ў Беларусі за каментарыі — СМІ

Рэдакцыя Reform.news · 14 мая 2026, 14:50

https://reform.news/be/iranskuju-studjentku-aryshtavali-belarusi-za-kamentaryi-smi/

Студэнтку-стаматолага з Ірана Хатэрэ Хадададзі затрымалі ў Беларусі за каментарыі пра Іран у адным з тэлеграм-каналаў, паведамляе іранскі тэлеканал ManotoTV, які базуецца ў Лондане.

Паводле інфармацыі тэлеканала, Хадададзі была затрыманая пры ўмяшанні пасольства Ірана ў Беларусі і атрымала 14 сутак арышту.

«Паводле слоў яе блізкіх, яна павінна была быць вызваленая 30 красавіка, аднак дагэтуль застаецца пад вартай, а яе статус навучання і знаходжання застаецца нявызначаным. Таксама паведамляецца, што падчас утрымання пад вартай яна была пазбаўленая доступу да адваката і магчымасці звязацца з сябрамі», — паведамляе тэлеканал.

Хатэрэ Хадададзі вучыцца на медыцынскім факультэце замежных навучэнцаў БДМУ. Яна была заяўленая як удзельніца студэнцкай канферэнцыі ў Мінску 29-30 красавіка з працай «Беласнежная ўсмешка — дар прыроды ці дасягненне медыцыны?».