Наўроцкі ўручыў Пачобуту найвышэйшую дзяржаўную ўзнагароду Польшчы
Рэдакцыя Reform.news · 3 мая 2026, 14:29
https://reform.news/be/na-rocki-ruchy-pachobutu-najvyshjejshuju-dzjarzha-nuju-znagarodu-polshchy/Былы палітвязень Анджэй Пачобут, журналіст і актывіст польскай меншасці ў Беларусі, атрымаў ордэн Белага Арла — найвышэйшую дзяржаўную ўзнагароду Польшчы. Цырымонія прайшла ў Каралеўскім замку ў Варшаве ў дзень Нацыянальнага свята 3 мая.
Ордэн быў прысвоены Пачобуту яшчэ 11 лістапада 2025 года, у Дзень незалежнасці Польшчы, аднак уручыць яго ўдалося толькі пасля вызвалення журналіста. Узнагарода прысуджана “ў знак прызнання выдатных заслуг у дзейнасці на карысць палякаў у Беларусі, у асаблівасці за барацьбу за правы чалавека і непахісную пазіцыю перад абліччам адраджэння таталітарных рэжымаў”.
Акрамя Пачобута, ордэнам Белага Арла ў гэты дзень былі ўзнагароджаны дырыжор Агнешка Дучмаль-Ярашэўска, грамадская дзеячка Ханна Лукоўска-Карней і кінарэжысёр Лех Маеўскі, паведамілі ў канцылярыі прэзідэнта Польшчы.
Ордэн Белага Арла — найстарэйшая і найвышэйшая дзяржаўная ўзнагарода Польшчы. Яна прысуджаецца за выдатныя грамадзянскія і ваенныя заслугі на карысць краіны Рэспублікі Польшча, як у мірны, так і ў ваенны час. Ордэнам узнагароджваюцца найбольш выбітныя палякі і высокапастаўленыя прадстаўнікі замежных дзяржаў.
У лютым 2023 года Анджэя Пачобута прыгаварылі да 8 гадоў калоніі ўзмоцненага рэжыму. Працэс праходзіў у закрытым рэжыме. Яго прызналі вінаватым у распальванні варожасці і закліках да санкцый. Ён быў вызвалены 28 красавіка ў выніку абмену па формуле 5 на 5.
