Оруэл, Руні, Рэмарк, Фіцджэральд: выдавецтва «Янушкевіч» анансуе працяг працы

На фэйсбук-старонцы выдавецтва «Янушкевіч» з’явіўся шматабяцальны допіс Андрэя Янушкевіча.

У ім выдавец выклаў спіс кніг, якія павінны былі выйсці гэтым летам, але так і не выйшлі з-за вядомых травеньскіх падзей.

• Джордж Оруэл «Ферма жывёлаў» (няма чаго дадаць)
• Кормак Маккарці «Дарога» (найлепшая постапакаліптыка XXI стагоддзя)
• Алесь Кудрыцкі «Казік з Каменнай Горкі і вядзьмар Схаванага горада» (беларускае фэнтэзі для падлеткаў)
• Салі Руні «Размовы з сябрамі» (сусветны бестселер сучаснасці)
• Эрнэст Хэмінгуэй «І ўзыходзіць сонца (Фіеста)» (гэты раман зрабіў аўтара знакамітым)
• Фрэнсіс Скот Фіцджэральд «Вялікі Гэтсбі» (няма чаго дадаць)
• Эрых Марыя Рэмарк «Чорны абеліск» (без каментарыяў)
• Павел Волотович, Алексей Ковалев «Минск тусовочный 90-х» (убойная кніга пра нефармальны горад)
• «Песня песняў», пераклад Сяргея Шупы (слынная старабіблейская кніга)

— Ці збяднеў беларускі кніжны рынак ад гэтага? – задае рытарычнае пытанне Андрэй Янушкевіч. ­– Пакінем гэтае пытанне без адказу. Затое нічога шкоднага не выйшла, і дзяржава можа спаць спакойна.

Выдавец Андрэй Янушкевіч запэўнівае, што гэтыя кнігі ўсё ж з’явяцца на свет, аднак тэрміны не раскрывае. Вядома, што разглядаюцца магчымасці выдання як папяровых кніг, так і ў электронным фармаце.

Гэты допіс сустрэў актыўную рэакцыю чытачоў, таму што папярэдні запіс зроблены 16 мая і тычыцца акцыі ў гонар адкрыцця кнігарні выдавецтва – «Кнігаўка».

Нагадаем, што ў гэты дзень – 16 мая – у кнігарню прыйшлі прапагандысты Азаронак і Гладкая, а пасля абеду ў памяшканні адбыўся ператрус. Выдавец і супрацоўніца Наста Карнацкая атрымалі суткі.

Перад гэтым, у студзені 2021 года, Дэпартамент фінансавых расследаванняў Камітэта дзяржаўнага кантролю Беларусі забраў тэхніку і заблакаваў рахунак выдавецтва, а ў чэрвені выдавецтва атрымала паведамленне пра магчымасць зноў карыстацца банкаўскім рахункам.

22 сакавіка выдавецтва «Янушкевіч» папрасілі вызваліць офіс на Мар’еўскай, 7А у Мінску. У сувязі з гэтым быў абвешчаны рапродаж кніг, дзеля якога сабралася вялізная чарга пакупнікоў.

Пасля блакіроўкі рахунка, закрыцця кнігарні і арышту Андрэй Янушкевіч распачынае працу за межамі Беларусі.

«Рукапісы не гараць», – піша ён у каментарах.