«SloMo: Хатняя крытыка культурнага дызайну» — у rock star культурнай журналістыкі Максіма Жбанкова выходзіць новая кніга

Reform.news · 2 июня 2021, 13:44

https://reform.news/230100-slomo-%D0%A5%D0%B0%D1%82%D0%BD%D1%8F%D1%8F-%D0%BA%D1%80%D1%8B%D1%82%D1%8B%D0%BA%D0%B0-%D0%BA%D1%83%D0%BB%D1%8C%D1%82%D1%83%D1%80%D0%BD%D0%B0%D0%B3%D0%B0-%D0%B4%D1%8B%D0%B7%D0%B0%D0%B9%D0%BD%D1%83-%D1%83-rock-star-%D0%BA%D1%83%D0%BB%D1%8C%D1%82%D1%83%D1%80%D0%BD%D0%B0%D0%B9-%D0%B6%D1%83%D1%80%D0%BD%D0%B0%D0%BB%D1%96%D1%81%D1%82%D1%8B%D0%BA%D1%96-%D0%9C%D0%B0%D0%BA%D1%81%D1%96%D0%BC%D0%B0-%D0%96%D0%B1%D0%B0%D0%BD%D0%BA%D0%BE%D0%B2%D0%B0-%D0%B2%D1%8B%D1%85%D0%BE%D0%B4%D0%B7%D1%96%D1%86%D1%8C-%D0%BD%D0%BE%D0%B2%D0%B0%D1%8F-%D0%BA%D0%BD%D1%96%D0%B3%D0%B0/

Пра хуткі выхад зборніка эсэ Максіма Жбанкова абвясціла на сваёй старонцы ў Facebook кніжнае выдавецтва «Янушкевіч».

«Гэтая неардынарная кніга — суплёт пярэстых (стылістычна і моўна) тэкстаў, аб’яднаных агульнай тэмай: айчынная культура мінулага дзесяцігоддзя і яе асноўныя праявы, — адзначаецца ў анонсе. — Аўтар як заўжды аджыгае ды інцярэснічае. Шукае кідкія маркеры для персон і сітуацый. Пазначае паходжанне новых герояў і даследуе тэхнікі беларускага поспеху. Тлумачыць адхіленні і паталогіі. Запрашае да спрэчак і нязгоды. Адбудоўвае прастору крытычнага мыслення — для тых, хто хоча большага і робіць нечаканае«.

Аўтар кнігі ў сваёй прадмове да «SloMo: Хатняя крытыка культурнага дызайну» піша так.

«Гэтая кніжка з мінулага жыцця. Якое рэзка скончылася ў жніўні 2020-га. Ранейшыя схемы раптам абнуліліся. Мастацтва культурнага манеўру страціла свой сэнс. Час нанова вучыцца думаць. Дык навошта новай эпосе старыя тэксты? Каб зразумець, што з намі здарылася ўчора. І як мы сталі сённяшнімі».

Максім Жбанкоў — беларускі культуролаг, кінакрытык і культурны журналіст, які пазначае жанр, у якім працуе, як «жывы падкаст» ці «інтэлектуальны стэнд-ап». У прыватнасці, апошні праект эксперта «Шокінг культ з Максімам Жбанковым» на Epramova аналізуе сучасныя працэсы ў культуры і палітыцы, шукаючы «трапныя маркеры для новага часу» .

«SloMo» — гэта ўжо другая кніга аўтара. Зборнік эсэ «NO STYLE. Белкульт между Вудстоком и «Дажынкамі», апублікаваны ў 2013 годзе, стаў заўважнай падзеяй у інтэлектуальнай прасторы Беларусі.

Наклад новага выдання «SloMo: Хатняя крытыка культурнага дызайну»- 450 экзэмпляраў. Кніга мусіць з’явіцца ў продажы ўжо ў чэрвені.