Сёння ў Польшчы пачынае працу амерыканская дэлегацыя, якой будуць прадстаўлены месцы магчымага размяшчэння пастаяннай ваеннай базы ЗША. Пра гэта ў эфіры RMF24 паведаміў намеснік міністра абароны Польшчы Павел Бэйда.
«Пачынаючы з сённяшняга дня, нас на два дні наведае амерыканская дэлегацыя. У нас ёсць некалькі важных месцаў, якія мы хочам паказаць амерыканцам. Ці будзе гэта некалькі баз або толькі адна, вырашаць сілы і структуры НАТА», – сказаў ён.
Дзе менавіта могуць з’явіцца базы, пакуль невядома. Амерыканцам прапануюць некалькі пляцовак. Іх выбар будзе ўвязаны з аперацыйнымі структурамі НАТА.
Усе выдаткі на будаўніцтва і ўтрыманне баз будзе несці польскі бок, што складзе больш за 10 млрд злотых.
З’яўленне пастаяннай амерыканскай базы – перспектыва на некалькі гадоў. Рэальным тэрмінам Бэйда назваў 2030 год. Спатрэбіцца пабудаваць не толькі ваенную, але і грамадзянскую інфраструктуру для амерыканскіх вайскоўцаў.
На пастаянных базах можа размясціцца да 5 тыс. салдат з ЗША, а астатняя частка кантынгенту будзе знаходзіцца на ратацыйнай аснове. Цяпер у Польшчы няма буйных ваенных баз ЗША, ваенная прысутнасць рэалізуецца на ратацыйнай аснове.