Веткаўскі музей стараабрадніцтва і беларускіх традыцый адкрыў збор сродкаў на ўнікальны экспанат XVIII стагоддзя

Год таму з дапамогай неабыякавых людзей Веткаўскі музей змог прыдбаць для калекцыі шыкоўны экспанат, прыклад веткаўскай іканапіснай школы, — паведамляюць на сайце музея. Гэта ікона з выявай Божай Маці, якая з’яўлялася часткай Царскай брамы XIX стагоддзя, а дакладней створкай з наверша брамы.

Царская брама — важны элемент іканастаса ў царкве — вельмі рэдкі і амаль невядомы помнік стараабрадніцкага мастацтва Веткі. Бо, на жаль, стараабрадніцкія храмы ў розныя перыяды разараліся ды знішчаліся.

Вядома, што на другой створцы, побач з выявай Божай Маці, была выява Архангела Гаўрыіла. Шанец знайсці другую створку з той брамы, ці іншы фрагмент — амаль нулявы. Таму, каб у экспазіцыі адрадзіць вобраз Царскай брамы крыху больш поўна — побач з абразом Божай Маці адлюстравалі прыблізны прорыс фрагмента створкі з Архангелам Гаўрыілам.

Прайшоў амаль год. І выпадкова ўдалося знайсці больш ранняе і поўнае наверша з Царскай брамы. Дзве створкі брамы — гэта дзве іконы з выявамі Божай Маці і Архангела Гаўрыіла — унікальны веткаўскі іканапіс канца XVIII стагоддзя.

Іконы знаходзяцца ў прыватнай калекцыі. Калекцыянер згодны іх прадаць.

Неабходная сума — 8500 рублёў.

Сума занадта перавышае бюджэт музея, і каб набыць гэты цудоўны экспанат, музею патрэбна дапамога.

«Элементы Царскай брамы — рэдкі і ўнікальны помнік Веткаўскай школы іканапісу, які вельмі не хацелася б упусціць. Хочацца, каб нашы культурныя і гістарычныя помнікі мы і нашы дзеці маглі бачыць, і бачыць дома, а не ў музеях іншых краін», — пішуць музейшчыкі Веткі.

Пералічыць грошы можна на спонсарскі рахунак.

Рэквізіты. Разліковы рахунак у ААТ «Беларусбанк», у беларускіх рублях:

УНП (УНН): 400560905

Рахунак (IBAN): BY65AKBB36424130002703100000

БІК (код банка): AKBBBY2X

Атрымальнік: Веткаўскі музей

Код прызначэння плацяжу: 44201

Прызначэнне пераводу: на набыццё прадмета музейнага значэння
(гэта неабходна пазначыць абавязкова)

Каб аплаціць праз інтэрнэт-банкінг/мабільнае прыкладанне, выбірайце не АРІП, а Пераводы — Па рэквізітах.

Спасылка на рэквізіты для спампоўкі.

Падпісвайцеся на культурныя навіны Reform.by у Telegram