У Віцебскім абласным краязнаўчым музеі працуе выстава беларускай маляванкі «Мастацтва святла». Экспазіцыя прадстаўляе ўнікальны зрэз беларускага наіўнага мастацтва — ад прызнаных шэдэўраў мінулага да сучасных інтэрпрэтацый.
Цэнтральнае месца ў экспазіцыі займаюць творы Язэпа Драздовіча і Алены Кіш. Артэфакты, якія сталі сімвалам беларускага касмізму і народнай марай пра «рай на зямлі», прывезлі з Гісторыка-культурнага музея-запаведніка «Заслаўе» і Мастацка-этнаграфічнага музея імя Драздовіча.
Сучаснае прачытанне традыцыі паказалі майстры народнай студыі «Рошва» з Полацка. Мастакі эксперыментуюць з сюжэтамі і колерам, захоўваючы пазнавальную тэхніку, але напаўняючы яе новымі сэнсамі.
На выставе паказалі працы з фондаў Віцебскага абласнога метадычнага цэнтра народнай творчасці, якія адлюстроўваюць рэгіянальныя асаблівасці маляванкі. І драўляныя скульптуры Ганны Асіпковай — адзінай разьбяркі па дрэве ў Віцебскай вобласці з Чашніцкага раёна.
Выстава будзе даступная для наведвання да 12 сакавіка.
