У Варшаве пройдзе MALDZIS-фэст: сярод удзельнікаў — Святлана Алексіевіч, Лявон Вольскі, Саша Філіпенка

13 ліпеня 2026 года ў варшаўскім Музеі сучаснага мастацтва (MSN) адбудзецца MALDZIS-фэст — форум, які аб’яднае вядучых дзеячаў, што вызначаюць і папулярызуюць сучасную беларускую культуру. Цэнтральнай падзеяй вечара стане публічная размова з пісьменніцай і Нобелеўскай лаўрэаткай Святланай Алексіевіч. Арганізатары ўжо адкрылі рэгістрацыю наведвальнікаў.

Праграма фестывалю падзелена на некалькі тэматычных блокаў, якія ахопліваюць шырокі спектр пытанняў: ад прэзентацыі гістарычных артэфактаў да ўплыву штучнага інтэлекту на літаратуру і прэзентацыі беларускага культурнага коду ў Еўропе.

Што там адбудзецца?

Адкрыццё і размова з Нобелеўскай лаўрэаткай

Форум пачнецца з уступнага слова арганізатараў — Рыгора Астапені і Паўла Мацукевіча, якія прэзентуюць новы каштоўны артэфакт з калекцыі праекта MALDZIS.

Галоўным пунктам праграмы стане дыскусія з удзелам Святланы Алексіевіч (мадэратар — Рыгор Астапеня). Сустрэча будзе прысвечана новай кнізе пісьменніцы, яе ранейшым творам, а таксама таму, як беларуская літаратура пераўтвараецца ў сэнсы, праз якія сучасны свет успрымае Беларусь.

Прафесійныя панэлі: «Як ствараць беларускую культуру»

Асобны блок фестывалю будзе адведзены пад серыю выступаў у фармаце кароткіх мэтавых дакладаў. Мадэраваць гэтую частку будзе журналіст Саша Івулін.

Сярод заяўленых тэм і спікераў:

• сузаснавальнік Беларускага Свабоднага тэатра Мікалай Халезін выступіць з тэмай «Якія культурныя праекты цяпер патрэбныя?»;
• Праект «Этыка» абмяркуе пытанне «Як святкаваць беларускую традыцыю?»;
• «Хто напісаў гэтую кнігу? Аўтарства і адказнасць у эпоху ШІ» — тэма прэзентацыі кіраўніцы выдавецтва Gutenberg Publisher Валянціны Андрэевай;
• Мастацтвазнаўца Дзмітрый Салодкі распавядзе ў сваім выступе пра беларускі культурны код у люстэрку сумежных еўрапейскіх традыцый.
• Мастак Саша Адамаў падзеліцца лайфхакамі — «Як беларускаму мастаку стварыць санаторый падчас Warsaw Gallery Weekend?».

Дыскусія пра вобраз Беларусі ў свеце

Завершыць праграму панэльная дыскусія «Пра што расказвае свету беларуская культура?», мадэратарам якой выступіць кінакрытык Ірэна Кацяловіч. У абмеркаванні прымуць удзел пісьменнік Саша Філіпенка і музыка Лявон Вольскі. Імя яшчэ адной спікеркі панэлі арганізатары абяцаюць урэгуляваць і назваць пазней.

Уваход на ўсе падзеі фэсту вольны, але па папярэдняй рэгістрацыі.

З-за абмежаванай колькасці месцаў у залі Музея сучаснага мастацтва арганізатары звяртаюць увагу, што не ўсе заяўкі могуць быць пацверджаны аўтаматычна. Статус запыту неабходна правяраць праз лісты-пацверджанні на электроннай пошце.

MALDZIS — культурніцкая ініцыятыва, накіраваная на вяртанне беларусам страчанай гістарычнай спадчыны і ўмацаванне вобраза Беларусі як еўрапейскай краіны. Праект названы ў гонар выбітнага беларускага літаратуразнаўцы, пісьменніка і гісторыка Адама Мальдзіса, які прысвяціў жыццё пошуку і вяртанню з забыцця страчаных культурных каштоўнасцей краіны.

Падпісвайцеся на культурныя навіны Reform.news у Telegram