Напрыканцы снежня на сцэне РТБД паказалі прэм’еру легенды ў дзвюх дзеях «Ладдзя роспачы» паводле Уладзіміра Караткевіча ў пастаноўцы Святланы Навуменкі.
Сам Уладзімір Караткевіч лічыў сваю аповесць найбольш удалай спробай даць абагульнены характар беларусу, «якому і чорт не брат, якога і смерць не палохае, які больш за ўсё любіць Радзіму, жыццё і весялосць і ні пры якіх абставінах не ўступіць у барацьбе за іх».
У РТБД «Ладдзя роспачы» ствараўся як спектакль-роздум. Рэжысёрка ўбачыла ў аповесці Караткевіча выразнае пытанне: «Ці ёсць нешта пасля фізічнай смерці?», а таксама адкрыты канфлікт жыцця і смерці.
«Нашы радасці і нашы злачынствы, любоў і здрада, мужнасць і страх – усё гэта пляце нябачнае павуцінне нашага лёсу. Ці працягваецца яно далей за межы жыцця?..», — тлумачаць у анатацыі да спектакля галоўны канцэпт твора.
Важную ролю ў спектаклі адыгрывае сцэнаграфія. «Мастак-сцэнограф Юрый Саламонаў прапанаваў абсалютна незвычайнае рашэнне: на сцэне мы стварылі тры паверхі, як кругі пекла ў Дантэ. Унізе зямное жыццё простых людзей, ледзь вышэй — жыццё каралёў, а наверсе толькі смерць. Сцэнаграфія шмат у чым прадыктавала астатнія элементы спектакля. Мастак па касцюмах Таццяна Лісавенка зрабіла цікавую гістарычную стылізацыю. Таксама на сцэне можна ўбачыць гістарычныя габелены, надрукаваныя на спецыяльным палатне. Яны адсылаюць нас да таго часу, калі габелены былі вельмі папулярныя», — расказала Святлана Навуменка карэспандэнту БелТА.
Музыку да спектакля стварыў беларускі кампазітар Андрэй Лабчэўскі, перад ім стаяла няпростая задача: патрэбна была этнічная і разам з тым замкавая, дваранская музыка, а таксама музыка, якая адсылае нас да тагасветнага. Выдатную працу зрабіў і мастак па святле Аляксей Ладышаў, які стварыў «незвычайна інтэлігентнае», тонкае святло, дзе выкарыстаў рэльеф і кантрасты.
Дарэчы, білеты на бліжэйшыя паказы ў студзені ўжо распрададзены. Наступная дата, калі яшчэ можна трапіць на «Ладдзю роспачы», — 19 лютага. У гэты дзень прэм’еру пакажуць у Доме афіцэраў.
Падпісвайцеся на культурныя навіны Reform.news у Telegram
