Фота: сацсеткі сям'і мастака.
«З’ява» — у Нацыянальным цэнтры сучасных мастацтваў у Мінску працуе выстава стваральніка нейраарту, беларускага жывапісца, скульптара, музыканта Захара Кудзіна. Вялікі персанальны выставачны праект беларускага мастака, які трагічна сышоў з жыцця ў 2019 годзе, падрыхтаваны пры ўдзеле сям’і творцы.
Экспазіцыя твораў аднаго з найяскравейшых прадстаўнікоў сярэдняга пакалення беларускага мастацтва размяшчаецца ў васьмі залах. На выставе прадстаўлены як вядомыя работы аўтара, так і тыя, якія раней не дэманстраваліся. Таксама часткай выказвання з’яўляюцца фотаздымкі з сямейнага архіва Захара Кудзіна, яго асабістага архіва. У прыватнасці, у адной з залаў можна ўбачыць галерэю «селфі» стваральніка нейраарту. Як падкрэсліваюць арганізатары праекта, адной з задач ініцыятывы было пазнаёміць гледача як з мастацкай іпастассю беларускага творцы, так і паказаць яго як асобу.
«Выстава «З’ява» – гэта спроба асэнсаваць феномен творцы, які стаў адной з самых яркіх зорак беларускага мастацтва апошніх дзесяцігоддзяў», — адзначаецца ў анатацыі да праекта.
Стваральнік нейраарту Захар Кудзін нарадзіўся ў 1986 годзе ў Мінску. Яго прафесійнае станаўленне адбывалася не толькі ў Беларусі: пасля заканчэння мастацкай вучэльні ў Мінску мастак паехаў у Нью-Ёрк. Жыў і падарожнічаў у Злучаных Штатах, вывучаючы амерыканскае арт-асяроддзе. Пасля вяртання ў Беларусь ён уліваецца ў калектыўныя праекты, супрацоўнічае з галерэямі, робіць персанальныя выставы. Захар Кудзін — самы малады мастак, чыя праца знаходзіцца ў калекцыі Нацыянальнага мастацкага музея Беларусі. Адным з найяскравейшых праектаў аўтара ў 2019 годзе становіцца «Ледзяны палёт. Гарачы космас» — роспіс будынка на вуліцы Кастрычніцкая ў рамках фестывалю урбан-арта Vulica Brasil. Дакументальны фільм «Чыстае мастацтва» Максіма Шведа не адбыўся б без удзелу Захара — у карціне мастак з’яўляецца правадніком мастацтва ў гарадское асяроддзе. Здавалася б, творчая актыўнасць Захара Кудзіна толькі ўзрастала ў 2010-я, аднак у снежні 2019-га ён прымае рашэнне аб сыходзе з жыцця.
Выстава «З’ява» будзе працаваць у Нацыянальным цэнтры сучасных мастацтваў (вуліца Някрасава, 3) да 27 кастрычніка.
Падпісвайцеся на культурныя навіны Reform.news у Telegram