Толькі тры дні прапрацавала выстава «Беларускі бестыярый» у мінскай галерэі «Мастацтва». «Сябры! Па незалежных ад нас прычынах выстава Беларускага бэстыярыя зачыненая. Экскурсій больш ня будзе», — паведамленне пра закрыццё праекта заўважыла ў Instagram выданне «Наша Ніва».
Папярэдне выстава мусіла працаваць да 22 сакавіка.
«Просім прабачэння ва ўсіх, хто толькі планаваў наведаць выставу, і тых, хто ўжо запісаўся на экскурсіі, — паведамілі ў Instagram арганізатары праекта. — У гэтых абставінах мы робім аўдыягід агульнадаступным», — дадалі яны.
«Беларускі бэстыярый» адкрыўся ў галерыі «Мастацтва» 11 сакавіка: пра адкрыццё экспазіцыі напісала дзяржаўная газета «Звязда».
Але ўжо на другі дзень у адрас экспазіцыі з’явілася крытыка ад праўладнай мастачкі і актывісткі Святланы Жыгімонт.
«Цудоўныя выставы праходзяць у Палацы ў Вялікі пост», — напісала яна.
Незадаволенасць Жыгімонт падхапілі яе паплечнікі — Вольга Бондарава і Аляксандр Плавінскі.
«Засталося толькі асьвяціць выставачную залю галерэі мастацтва і некаторых недамастакоў, апантаных д’яблам, сьвятой вадой. Цяпер на гэтым месцы рыхтуецца новая экспазыцыя карцін», — напісаў Плавінскі і апублікаваў фоты таго, як выстаўку здымаюць.
Падпісвайцеся на культурныя навіны Reform.news у Telegram
