Ва ўзросце 91 года памёр легендарны італьянскі мадэльер Джорджыа Армані, заснавальнік знакамітага аднайменнага брэнда Giorgio Armani, паведамляе Reuters са спасылкай на афіцыйную заяву кампаніі.
«З бясконцым смуткам Armani Group аб’яўляе пра смерць свайго стваральніка, заснавальніка і нястомнай рухаючай сілы: Джорджыа Армані», — гаворыцца ў заяве.
Па дадзеных СМІ, у апошні час мадэльер адчуваў сябе кепска, таму быў вымушаны адмовіцца ад паказу сваёй калекцыі на тыдні мужчынскай моды ў Мілане ў чэрвені, прапусціўшы адно з подыумных мерапрыемстваў.
Ён кіраваў аднайменнай кампаніяй — модным домам Armani, якую пачаў будаваць з нуля ў 1975 годзе пасля таго, як сабраў сродкі ад продажу свайго Volkswagen Beetle. На той момант мадэльеру было ўжо 40 гадоў. Праз 7 гадоў Армані трапіў на вокладку часопіса Time.
Сваю першую калекцыю Армані прадставіў восенню 1976 года. Дызайнер быў вядомы тым, што кантраляваў кожную дэталь сваёй калекцыі і кожны аспект свайго бізнесу, ад рэкламы да ўкладкі прычосак мадэляў перад выхадам на подыум.
«Сапраўднасць ёсць і заўсёды будзе актуальная, не ў апошнюю чаргу таму, што яна становіцца ўсё больш рэдкай. Без аўтэнтычнасці, уласна, усё трывае няўдачу», — сказаў Джорджыа Армані ў інтэрв’ю брытанскаму Vogue незадоўга да свайго 85-годдзя.
У суботу і нядзелю ў Мілане будзе арганізавана развітанне з Армані. Дата пахавання яшчэ не абвешчаная.
Падпісвайцеся на культурныя навіны Reform.news у Telegram