У Галівудзе пройдзе трохдзённы фестываль культуры «Беларуская вясна ў Фларыдзе»

З 31 сакавіка па 2 красавіка ў Халандэйле/Галівудзе адбудзецца фестываль культуры «Беларуская вясна ў Фларыдзе». Пра цікавую імпрэзу паведаміў у сваіх сацсетках бізнесмен, актыўны сябра беларускай дыяспары Злучаных Штатаў Амерыкі Віталь Самсонаў.

Праграма трохдзённага фэсту культуры заяўлена вельмі разнастайнай. У яе межах — канцэрты, выставы, кінапаказы, паэтычныя вечары.

Так, у час “Беларускай вясны ў Фларыдзе” адбудзецца інтэрактыўная прэзентацыя праекта «Арт-Пратэст» беларускага сцэнарыста і рэжысёра Андрэя Курэйчыка.

Вядомая беларуская рэжысёрка Дар’я Жук асабіста прыедзе на паказ сваёй нашумелай карціны «Крышталь».

Канцэрт беларускіх народных спеваў, музычны вечар Змітра Вайцюшкевіча — густоўна выглядае і музычная частка імпрэзы.

Паэтычны вечар беларускіх вершаў з Таццянай Шэінай, лаўрэаткай шматлікіх літаратурных фестываляў — для тых, хто цікавіцца беларускім словам.

Пазнаёміцца з беларускім сучасным мастацтвам можна будзе на выставе беларускіх мастакоў з Беларусі.

«Вечарыны, сустрэчы і нэтворкінг з надзвычайнымі беларусамі і шмат іншых сурпрызаў і прыемных нечаканасцяў!», — так анансуе Віталь Самсонаў будучы фэст.

Месца падзеі пакуль не паведамлялася. Але па словах арганізатараў, звесткі пра пляцоўку мерапрыемства мусяць быць аб’яўлены неўзабаве.

«Такога ў Амерыцы яшчэ не было», — запрашаюць на вясновы фестываль беларусы Фларыды.

Падпісвайцеся на культурныя навіны Reform.by у Telegram