Стала вядома пра спыненне працы двух знакавых беларускіх інтэлектуальных рэсурсаў. Літоўска-амерыканскі правайдэр адмовіў у абслугоўванні пляцовак Belcollegium.com і Abdziralovic.com, пазначыўшы іх як «праекты з беларускімі каранямі».
Сітуацыя выклікала рэзананс у інтэлектуальных колах. Адзін з заснавальнікаў платформаў адзначыў, што гэта не проста тэхнічны інцыдэнт, а сімвалічны момант «развітання з эпохай». Паводле яго слоў, мы апынуліся ў новай культурнай сітуацыі, дзе магчымасць «думаць і прамаўляць складаныя рэчы» трапляе пад двайны ціск — як унутраны, так і знешні.
Што ўяўлялі сабой гэтыя рэсурсы?
Гэтыя сайты былі не проста інтэрнэт-старонкамі, а жывымі архівамі нацыянальнай думкі апошніх дзесяцігоддзяў.
«Беларускі Калегіюм» быў заснаваны ў канцы 1990-х як нефармальная вышэйшая школа. Калегіюм стаўся галоўнай пляцоўкай для сучаснай беларускай гуманітарыстыкі — гэта быў «універсітэт па-за мурамі», дзе выкладаліся філасофія, літаратура, найноўшая гісторыя і палітычныя навукі. Сайт з’яўляўся велізарнай базай унікальных курсаў і лекцый, якія фармавалі еўрапейскі вектар беларускага мыслення для цэлых пакаленняў журналістаў і інтэлектуалаў.
Праект «Абдзіраловіч.ком» — платформа, названая ў гонар філосафа і паэта Ігната Абдзіраловіча, аўтара знакамітага эсэ «Адвечным шляхам». Праект стаўся прасторай для глыбокай рэфлексіі над беларускай ідэнтычнасцю, якая пазіцыянавалася як «лабараторыя сэнсаў». Сайт збіраў тэксты, якія сталі класікай сучаснай філасофскай думкі, забяспечваючы сувязь паміж рознымі пакаленнямі беларускіх мысляроў.
Рэсурсы, якія дзесяцігоддзямі працавалі на еўрапеізацыю Беларусі, аказаліся закладнікамі спрошчаных падыходаў міжнародных тэхналагічных кампаній. Гэта фактычна азначае «лічбавы канселінг» для незалежнай беларускай думкі, якая цяпер апынулася ў сітуацыі двайной ізаляцыі.
Падпісвайцеся на культурныя навіны Reform.news у Telegram
