20 жніўня прэм’ерным спектаклем мінулага тэатральнага сезона «Памінальнай малітвай» Рэспубліканскі тэатр беларускай драматургіі пачаў XXXIV тэатральны сезон. Прэм’ера твора рускага пісьменніка-сатырыка, драматурга, сцэнарыста Рыгора Горына адбылася ў тэатры 4 і 5 чэрвеня. Рэжысёр-пастаноўшчык — заслужаны дзеяч мастацтваў Расіі Юрый Пахомаў.
Сёння – 21 жніўня – будуць граць «Заручыны», спектакль, што перадае атмасферу Менска канца XIX – пачатку XX стагоддзяў.
Першай прэм’ерай новага сезона стане пастаноўка Святланы Навуменка «Ладдзя Роспачы» па аднайменнай навеле класіка беларускай літаратуры Уладзіміра Караткевіча. Рэжысёрка разам з акцёрамі тэатра раскажуць моцную гісторую пра лёс чалавека, унутраную барацьбу і сілу духу. Прэм’ера запланавана на снежань 2025 года.
Новы сезон атрымаў адмысловую назву – «сезон сэнсаў». «Тэатр прапануе гледачам не проста бачыць і чуць гісторыі, якія будуць расказаны са сцэны, а шукаць свае сэнсы, асэнсоўваць перажыванні і знаходзіць адказы на важныя пытанні», — пішуць на сайце тэатра.
30 жніўня на сцэну вернецца спектакль «Вар’ятка» – пранізлівая гісторыя, якая дапамагае задумацца аб межах асабістай рэальнасці, чалавечай апантанасці і далікатнасці ўнутранага свету.
А таксама гледачоў РТБД чакаюць спецыяльныя праекты, цікавыя формы ўзаемадзеяння, тэатралізаваныя чытанні п’ес ад Цэнтра беларускай драматургіі.
Аснову рэпертуару РТБД – больш за 70% пастановак – складаюць творы беларускіх аўтараў. Усе спектаклі тэатра ідуць на беларускай мове.
Падпісвайцеся на культурныя навіны Reform.news у Telegram