Сёння вечарам, 26 чэрвеня, у варшаўскім касцёле Святога Аляксандра адбудзецца канцэрт арганнай музыкі «Podhaiska gra Podhajską». Вядомая беларуская кампазітарка і арганістка Вольга Падгайская разам са скрыпачкай Лейлай Акберавай ужывую прэзентуюць творы з яе новага студыйнага альбома «Organ Works».
Як раней паведамляў Reform.news, новая кружэлка беларускай кампазітаркі, якая зараз жыве і працуе ў Варшаве, выйшла на польскім саблейбле Opus-series.com. У альбом увайшлі дзевяць кампазіцый, у цэнтры музычнага сусвету якіх знаходзіцца арган, спалучаны з сучаснай музычнай мовай і тонкай гукавой чуллівасцю.
Паводле слоў самой аўтаркі, гэты альбом — глыбока асабістая і інтымная гісторыя пра жыццё ў часы татальнай нявызначанасці, трывогі і грамадскага напружання. Кожны твор напісаны як рэакцыя на сучасныя выклікі — унутраны страх, гнятлівую цішыню, вострую патрэбу ў чалавечай блізкасці і пошук святла, нягледзячы ні на што.
Вольга Падгайская вядомая як аўтарка шматлікіх арганных, оперных, сімфанічных і камерных твораў, а таксама музыкі да тэатральных пастановак і кінафільмаў. Яна вядзе актыўную канцэртную дзейнасць і папулярызуе творчасць сучасных кампазітараў.
Час і месца прэзентацыі: 26 чэрвеня, а 19:00, Варшава, Касцёл Святога Аляксандра, Плошча Трох Крыжоў 10/14 (Plac Trzech Krzyży 10/14). Падрабязнасці тут.
Падпісвайцеся на культурныя навіны Reform.news у Telegram
