Паказ спектакля «Po co babie sztuka?» адбудзецца ў Варшаве ў Scena Metro.
«Po co babie sztuka?» — гэта развага пра сутнасць творчасці, унутраную свабоду і межы, якія грамадства, гісторыя і абставіны накладаюць на чалавека — асабліва на жанчыну.
У цэнтры аповеду — лёсы дзвюх мастачак: беларускай Алёны Кіш і польскай Тамары Лемпіцкай. Два жыцці, два погляды на мастацтва, дзве дарогі — і адно агульнае пытанне: што вызначае мастака? Сацыяльны статус, паходжанне, прызнанне? Ці, магчыма, унутраная патрэба тварыць — насуперак усяму?
Стваральніцы спектакля праводзяць паралель паміж асабістымі гісторыямі гераінь і гісторыяй дзвюх краін — Польшчы і Беларусі. Краін, якія маюць агульнае мінулае, але ідуць рознымі шляхамі. Гэта не толькі партрэты мастачак, але і развага пра культурную памяць, ідэнтычнасць, расколіны і пункты судакранання.
У спектаклі таксама закранаецца тэма эміграцыі — як знешняй, так і ўнутранай. Што выбірае творца: застацца ў сваёй краіне і змагацца з нябачнасцю ці з’ехаць і спрабаваць заявіць пра сябе ў чужым свеце? Дзе заканчваецца свабода і пачынаецца выгнанне? Дзе дом мастака — там, дзе ён нарадзіўся, ці там, дзе яго чуюць?
«Po co babie sztuka?» — гэта дыялог паміж эпохамі, паміж жанчынамі і грамадствам, паміж краінамі і лёсамі. Гэта спроба знайсці ўласны голас — і захаваць яго.
Спектакль рэалізаваны ў межах Стыпендыяльнай праграмы Міністра культуры і Нацыянальнай Спадчыны Gaude Polonia.
Рэжысёрка спектакля – Юлія Шаўчук.
Прэм’ера спектакля адбылася 28 чэрвеня 2025 у Варшаве.
Квіткі можна набыць тут.
Падпісвайцеся на культурныя навіны Reform.news у Telegram
