«Памяць, у якую можна ўвайсці»: віртуальны эмбіент Sad Orchestra, прысвечаны Аляксею Стрэльнікаву, Арцёму Залескаму і Леаніду Нарушэвічу, загучаў у сеціве

«Чтобы выжить, необходимо счастье, помощь», — у плыні музыкі гучаць словы тэатральнага крытыка Аляксея Стрэльнікава. Занурыцца ва ўспаміны і здзейсніць шпацыр памяці запрашае Sad Orchestra — медыяпраект, прысвечаны Леаніду Нарушэвічу, Арцёму Залескаму і Аляксею Стрэльнікаву — дзеячам беларускага незалежнага мастацтва, якія сышлі з жыцця заўчасна ў 2019 і 2022 гадах.

Аўтары эксперыментальнага праекта, што з’яўляецца віртуальнай версіяй рэальнай мемарыяльнай прасторы на беразе Чарэйскага возера, у вядомай вёсцы Белая Царква ў Беларусі, — каманда фестывалю Sprava.

«Леанід, Арцём і Аляксей былі эксперыментатарамі, візіянерамі і суперфайнымі актарамі незалежнай беларускай сцэны, — адзначаюць стваральнікі. — Ствараючы «Аркестр Сад», мы пракладаем нябачныя, сімвалічныя повязі паміж нашымі героямі і намі, паміж мінулым і будучыняй — і нашымі, і альтэрнатыўнай культуры».

Вандраваць па віртуальным садзе на платформе можна ў двух рэжымах: Аўтадырыжор і Партытура. У любым выпадку гэта сустрэча з музыкай і галасамі творцаў. На платформе можна паслухаць разважанні тэатральнага крытыка і падзвіжніка Аляксея Стрэльнікава (электраакустычны праект музыкі і кампазітара Мацея Сабурава), убачыць творы мастака Bazinato, пазнаёміцца з дыскаграфіяй культавага бубнача Арцёма Залескага, трапіць на старонку кампазітара і музыкі-імправізатара Леаніда Нарушэвіча (як і Аляксея Стрэльнікава), паслухаць музыку Anton Anishchanka, які ўступіў у размову з гітарнымі партыямі Леаніда Нарушэвіча…

Sad Orchestra — гэта важны і інтымны досвед блукання па садах і парках нашай памяці, актуальныя знаёмствы — калі мы яшчэ кагосьці не ведаем, досвед стварэння прасторы, у якой мінулае, цяперашняе і будучыня — не лінія, а тое, што адбываецца з намі адначасова. Прызнанне ў любові, архіў гукаў і слоў…

Фізічныя каардынаты Сада — 54°38’30.0″N 29°18’29.6″E.

Віртуальны ўваход — тут.

Падпісвайцеся на культурныя навіны Reform.news у Telegram