Назвалі тэрміны пачатку рэстаўрацыі млына ў Лошыцкім парку і Пішчалаўскага замка ў цэнтры Мінска
Reform.news · 15 сентября 2025, 21:38
https://reform.news/nazvali-tjerminy-pachatku-rjesta-racyi-mlyna-loshyckim-parku-i-pishchala-skaga-zamka-cjentry-minska/Пра планы аднаўлення гістарычных аб’ектаў у сталічным Лошыцкім парку і Пішчалаўскім замку расказаў старшыня Мінгарвыканкама Уладзімір Кухараў у інтэрв’ю тэлеканалу «Першы інфармацыйны», піша агенцтва «Мінск-Навіны».
Пасля завяршэння рэканструкцыі гістарычнай забудовы паблізу Лошыцкага парку ў ім застаюцца два аб’екты, якія патрабуюць увагі, — капліца і млын. Па словах Кухарава, па іх распрацоўваецца праектная дакументацыя, а пачаць рэстаўрацыю плануецца ў 2026 годзе. У гэтым дапамогуць знойдзеныя выявы, на якіх будынкі адлюстраваны ў першародным выглядзе.
Акрамя таго, ідзе праектаванне па Пішчалаўскім замку, якому ў 2025-м спаўняецца 200 гадоў. Яго збіраюцца рэканструяваць і ўключыць у экскурсійны маршрут па гістарычным цэнтры Мінска, зрабіўшы часткай гарадской прасторы.
Працы плануюць пачаць напрыканцы года: «Мяркую, Пішчалаўскі замак стане ўпрыгожаннем горада Мінска, — растлумачыў старшыня Мінгарвыканкама. — Там будуць аб’екты грамадскага харчавання, гандлю, а таксама магчымасць арганізоўваць розныя мерапрыемствы. Ёсць дамоўленасць з нашым рыцарскім клубам, які таксама будзе іх ладзіць, каб дух даўніны, дух замка захоўваўся».
Каменны астрог у Мінску пабудавалі ў пачатку XIX стагоддзя замест драўлянага. Тэндар выйграў памешчык Рудольф Пішчала, які і пабудаваў аб’ект. За аснову быў узяты тыпавы праект турэмнага замка, зацверджаны расійскім імператарам для губернскіх гарадоў.
Падпісвайцеся на культурныя навіны Reform.news у Telegram