«Мы называем сябе Анора-family»: беларуска — пра досвед здымак у фільме-трыумфатары «Оскара»

«Мне […] спадабалася гэта гісторыя. Таму што звычайна ты глядзіш нейкія рамантычныя камедыі, там усё сканчваецца прыгожа […]. А Шон Бэйкер паказаў рэальнасць: як бы ты не хацела, напрыканцы можа быць балюча». Такое меркаванне пра фільм-трыумфатар «Оскара» «Анора» мае Марыя Тычынская (Maria Tichinskaya) — беларуска, якая сыграла ў нашумелым кіно адну з роляў, — дзяўчыны Дашы. Брэнд-менеджар з Беларусі, якая жыве ў Нью-Ёрку, трапіла ў праект, які сёння выйграў пяць статуэтак амерыканскай кінаакадэміі, цалкам для сябе нечакана.

Марыя Тычынская зараз працуе ў Нью-Ёрку брэнд-менеджарам, маркетолагам, але пэўны час жыла ў Польшчы. І менавіта досвед здымак у Польшчы падштурхнуў беларуску паўдзельнічаць у праекце Шона Бэйкера некалькі гадоў таму.

— Мая сяброўка прапанавала пабыць экстра ў масоўцы ў фільме, — распавяла яна ў інтэрв’ю «Голасу Амерыкі». — У мяне быў досвед [здымак] яшчэ ў Польшчы, калі мы былі студэнтамі. Гэта было цікава: цябе пакормяць, ты дзесьці там паходзіш, і табе дадуць грошы. Я ні на што не спадзявалася. Адправіла [заяўку] і забыла. Толькі потым, пасля я даведалася, хто такі Шон Бэйкер, — дадае яна. — Праз тыдзень прадзюсары напісалі, што я спадабалася рэжысёру, і што ён хоча прапанаваць мне ролю Дашы. Для мяне гэта аказалася лёгка. Гэта пра Нью-Ёрк як пра магчымасці. Я з лёгкасцю да гэтага паставілася, з лёгкасцю гэта да мяне і прыйшло.

Марыя падзялілася, што досвед працы на здымачнай пляцоўцы амерыканскай незалежнай стужкі для яе стаўся яскравым і незабыўным. Юрый Барысаў, які выконвае ў кіно адну з галоўных роляў, аказаўся «свойскім хлопцам». Актрысу Майкі Мэдысан, якая грае галоўную ролю Аноры, Марыя назвала «абсалютным талентам». Шон Бэйкер — «быў вельмі адкрыты, заўжды ў добрым настроі, падтрымліваў, атрымоўваў асалоду ад працэсу».

«Мы называем сябе Анора-фэмілі. Таму што мы здымалі тут два месяцы і пасябравалі. Было холадна, гэта была зіма ў Брукліне, потым паляцелі ў Вегас».

Марыя дадае, што Шон Бэйкер раіў да вобразу яе персанажа — Дашы — дадаваць персанальныя якасці. У фільме гераіня Дашы — сяброўка сына расійскага алігарха Івана, дзяўчына, якая са сваім бойфрэндам сама зарабляе сабе на жыццё ў маленькай забягалаўцы.

«Там [у пэўным момант фільма] быў экшн. Блін, што мне рабіць? «Будзь сабой» [такая была парада]. Гэта не ігра была, а жыццё. Я іграла сябе ў пэўны момант свайго жыцця. Я нібыта ўспомніла, дастала гэтага персанажа і проста асінхранізавалася. Я магу сказаць, што я актрыса па жыцці, у Нью-Ёрку без гэтага ты не выжывеш».

Кадр з фільма «Анора». Марыя Тычынская ў ролі Дашы — крайняя справа.

У цэлым карціна амерыканскага рэжысёра Марыі прыйшлася даспадобы.

«Мне настолькі спадабалася гэта гісторыя. Таму што звычайна ты глядзіш нейкія рамантычныя камедыі, там усё сканчваецца прыгожа, і ты ляжыш потым і думаеш: вось я чакаю прынца. А Шон Бэйкер паказаў рэальнасць: як бы ты ні хацела, напрыканцы можа быць балюча. Напрыканцы можна быць крыўдна, і гэта тое, што я адчувала, жывучы на працягу дзевяці гадоў у Нью-Ёрку, вельмі часта», — падсумоўвае яна.

Сёння, калі фільм ўжо з 2024 года здзяйсняе трыумфальнае шэсце па фестывалях, кінатэатрах, Марыя кажа, што ёй вельмі прыемна, калі ёй пішуць яе знаёмыя і сябры з усяго свету. А момант фотасесіі на чырвоным дыванку яна назвала незабыўным.

«Момант, калі ты стаіш на чырвоным дыванку і цябе фатаграфуюць, мне хацелася запомніць назаўжды», — прызналася яна.

Нагадаем, што ў цэнтры драмы Шон Бэйкера — гісторыя танцаўшчыцы стрыптыз-клуба Аноры. Дзяўчына знаёміцца ў клубе з маладым чалавекам Іванам — сынам расійскага алігарха, у іх завязваюцца стасункі, і Іван робіць Аноры прапанову ажаніцца. Калі маладыя бяруцца шлюбам у Лас-Вегасе, гэтыя звесткі даходзяць да бацькоў Івана, і яны адпраўляюць сваіх армянскіх хлопцаў «разабрацца з сітуацыяй».

«Анору» ў пэўным сэнсе можна называць антыказкай. У адрозненне ад гераіні Джуліі Робертс у «Прыгажуні», малады сужаны-мільянер Аноры акажацца зусім не «прынцам». Гэта карціна, якая спалучае драйзераўскую «Амерыканскую трагедыю» з жывым гумарам і кранальнасцю апавяданняў О. Генры.

Стужку робіць жывой і незабыўнай, сапраўды, ігра актораў — у прыватнасці, ігра Майкі Медысан, якая стварае вобраз Аноры, у якой цалкам побач жывуць сэксуальнасць, прагматызм, крохкасць, стойкасць, ранімасць.

Дадамо, што акрамя Марыі Тычынскай у «Аноры» здымалася яшчэ адна беларуска — Маша Жак. Яна сыграла ў кіно ролю хостэс.