Рэжысёр "Аноры", карціны-трыумфатара "Оскара", - Шон Бэйкер. Фота: bbc.com.
Трыумфатарам 97-й цырымоніі ўручэння прэміі «Оскар», якая прайшла сёння ў кінатэатры Dolby ў Лос-Анджэлесе, стала карціна амерыканскага рэжысёра Шона Бэйкера «Анора». Яна выйграла ў пяці намінацыях, у тым ліку як найлепшы фільм. Інтрыга ў дачыненні да акторскіх намінацый вырашылася наступны чынам: Дэмі Мур не атрымала доўгачаканую статуэтку — найлепшай актрысай прызналі Майкі Медысан за ролі Аноры. Без узнагароды застаўся і расійскі актор Юра Барысаў, якога вылучалі ў катэгорыі «Найлепшы актор другога плана».
Шон Бэйкер асабіста атрымаў прызнанне ў чатырох намінацыях — як найлепшы рэжысёр, прадзюсар, мантажор і аўтар арыгінальнага сцэнара. Ён выконваў усе гэтыя ролі ў «Аноры».
Працу Майкі Медысан, якая сыграла ў «Аноры» моцную і ўразлівую танцаўшчыцу стрыптыз-клуба, кінаакадэмікі палічылі больш пераканаўчай за ігру Дэмі Мур («Субстанцыя), Сінтыі Эрыва («Злая: казка пра ведзьму Захаду»), Карлы Сафіі Гаскон («Эмілія Перэс»), Фернанду Торэс («Я ўсё яшчэ тут»). Канкурэнцыя была моцнай, але Майкі перамагла. Адзначым, што маладой амерыканскай артыстцы, якая нарадзілася ў Лос-Анджэлесе, і на тры чвэрці з’яўляецца габрэйкай-ашкеназі, на чвэрць — брытанкай, 25 гадоў.
Свой другі «Оскар» у кар’еры займеў Эдрыян Броўдзі — за ролю архітэкатара Ласло Тота ў карціне «Бруталіст» Брэйдзі Корбера.
Эмігранцкая драма пра венгерскага архітэктара габрэйскага паходжання, які перажыў Халакост, была адзначана таксама ў катэгорыях «Найлепшая музыка да фільма» — Дэніэл Блумбэрг і «Найлепшая аператарская праца» — Лу Кроўлі.
Пераможцай у катэгорыі «Найлепшая актрыса другога плану» стала Зоі Салдана — за ролю Рыты Мары Кастра ў мюзікле «Эмілія Перэс» яны атрымала ўжо мноства ўзнагарод.
Нагадаем, што карціна Жака Адыяра, галоўны якой — наркадылер, які вырашае «выйсці з ігры» і дзеля гэтага змяняе свой пол, была намінавана ў трынаццаці катэгорыях і лічылася галоўным фаварытам прэміі. Па выніку мюзікл быў адзначаны толькі ў дзвюх: за акторскую працу Зоі Салдана і за найлепшую песню да фільма. Аўтарамі запамінальнай кампазіцыі El Mal з’яўляюцца Клюман Дзюколь, Каміль і Жак Адыяр. «Оскар» ім на цырымоніі ўручаў Мік Джагер.
Расійскага актора Юру Барысава ў катэгорыі «Найлепшы актор другога плана» абышоў амерыканец Кіран Калкін — кінаакадэмія ацаніла яго ігру ў фільме «Сапраўдны боль».
Найлепшым фільмам на замежнай мове стала бразільская драма «Я ўсё яшчэ тут» Вальтэра Салеса, у якой распавядаецца пра рэпрэсіі падчас ваеннай дыктатуры ў краіне.
Трыумфальным стаў 97-мы «Оскар» і для латвійскіх аніматараў. Стужка Гінтса Зілбалодзіса «Плынь» пра падарожжа ката і кампаніі на караблі падчас патопу перамагла ў катэгорыі «Найлепшы анімацыйны фільм».
«Канклаў» Эдварда Бергера атрымаў перамогу ў катэгорыі «Найлепшы адаптаваны сцэнар» — над ім працаваў Пітэр Строхан.
Найлепшай дакументальнай карцінай стала «Няма іншай зямлі», над стварэннем якой працавалі палесцінскія і ізраільскія кінематаграфісты: Базэль Адра, Рэйчэл Сор, Хамдан Балал і Юваль Абрахам. Падчас цырымоніі аўтары стужкі заклікалі да спынення вайны паміж Ізраілем і Палесцінай.
Глядзець поўны спіс пераможцаў 97-й прэміі «Оскар» можна тут.
Падпісвайцеся на культурныя навіны Reform.news у Telegram