Сёння арганізатары папулярнага оўпэн-эйра Festiwow, які два гады запар праходзіў на мінскім стадыёне «Дынама», афіцыйна заявілі аб адмене мерапрыемства ў 2026 годзе. Прычынай сталі «не залежныя ад каманды абставіны» — фактычная немагчымасць атрымаць гастрольнае пасведчанне.
Каманда фестывалю паведаміла, што падрыхтоўка да лета была на фінальнай стадыі: кантракты з артыстамі і партнёрамі былі падпісаныя, а продажы квіткоў павінны былі стартаваць днямі.
«Мы да апошняга верылі, што атрымаем дазвол на правядзенне нашага фестывалю, але, на жаль, закон ёсць закон. Для нас гэта было вялікім ударам… Дзякуй, што былі з намі гэтыя тры гады», — напісалі арганізатары ў сваім Instagram.
Адмена Festiwow — гэта ўжо трэці гучны сыход з беларускай фэставай мапы за апошні час. Раней аб немагчымасці працы заявілі культавы Lidbeer і нясвіжскі Wostrau.
Галоўнай перашкодай для прыватных арганізатараў стала пастанова Савета Міністраў №454 ад 22 жніўня 2025 года «Аб рэестры арганізатараў культурна-відовішчных мерапрыемстваў».
Гэты дакумент фактычна ўвёў дзяржаўную манаполію на фармаванне канцэртных праграм.
Да прыкладу, каманда Wostrau адкрыта прызнала, што адсутнасць магчымасці самастойна прывозіць замежных выканаўцаў робіць фэст немагчымым на тым узроўні, да якога прывыкла публіка.
Варта дадаць, што ў хэдлайнерах фэстаў былі артысты СНД.
На дадзены момант у планах на лета 2026 года застаюцца толькі Viva Braslav, belbet fest і пікнік VULITSA EZHA. Аднак эксперты адзначаюць, што пасля адмены Festiwow і Wostrau ціск на тых, хто застаўся, можа толькі ўзмацніцца.
Падпісвайцеся на культурныя навіны Reform.news у Telegram
