Міністр абароны Беларусі Віктар Хрэнін, выступаючы на 13-м Сяншанскім форуме ў Кітаі, заклікаў да пошуку кампрамісаў. На яго думку, шматпалярная архітэктура свету ўжо фарміруецца.
«Мы занадта часта бачым, як адны і тыя ж дзеянні атрымліваюць супрацьлеглую ацэнку ў залежнасці ад таго, хто іх здзяйсняе. У адным выпадку гавораць пра агрэсію супраць суверэннай дзяржавы, а ў іншым — пра неабходнасць узброенага ўмяшання», — паскардзіўся Хрэнін.
Ён адзначыў, што форум праходзіць у момант сур’ёзных выпрабаванняў.
“Працягваецца канфлікт на тэрыторыі Украіны. Узброенымі супрацьстаяннямі ахоплены Блізкі Усход. Узмацняецца ваенная актыўнасць у Азіяцка-Ціхаакіянскім рэгіёне. Адбываецца паступовая мілітарызацыя Арктыкі”, — сказаў ён.
На яго думку, гэтыя працэсы не з’яўляюцца выпадковымі.
“Яны цесна звязаныя з глыбокай трансфармацыяй сусветнага ўкладу. На нашых вачах набывае канкрэтныя абрысы шматпалярная міжнародная архітэктура, якая прапануе новыя, больш збалансаваныя і прывабныя мадэлі развіцця.
Відавочна, што змены такога сур’ёзнага маштабу не маглі не пацягнуць за сабой значную турбулентнасць у міждзяржаўных адносінах, а следам і крызіс сістэмы глабальнай бяспекі”, — растлумачыў міністр.
Ён адзначыў, што прычыны такога становішча ўжо станавіліся прадметам шырокага абмеркавання.
“Магчыма, іх галоўны вынік заключаецца ў тым, што ўсё большае разуменне атрымлівае простая, але прынцыпова важная думка: неабходна адмовіцца ад узаемных абвінавачанняў на карысць пошуку кампрамісу», — сказаў Хрэнін.
