Беларуская дыяспара ў Германіі ўпершыню ў гісторыі далучылася да Karneval der Kulturen (Карнавалу культур) у Берліне — аднаго з найбуйнейшых вулічных фэстаў Еўропы, які сёлета святкуе сваё 30-годдзе.
У нядзелю, 24 мая, нашы суайчыннікі выйшлі на вуліцы нямецкай сталіцы пад нумарам 17 з праектам «Belarus tanzt mit dem Drachen» («Беларусь танчыць з цмокам»). Эксклюзіўны фотарэпартаж з месца падзей прадаставіла Reform.news агенцыя lookby.media.
Удзел у вулічным шэсці была зладжаны незалежнай валанцёрскай ініцыятывай беларусаў.
Ад размоў у чаце да зборкі Цмока
Рухавіком і мастацкай кіраўніцай праекта стала берлінская дызайнерка адзення Nata Ko. Як творца паведаміла lookby.media, ідэя перформансу нарадзілася мінулым летам у адным з беларускіх чатаў у Германіі.
«Я гэтую ідэю прасоўвала-прасоўвала… У выніку я апынулася тым чалавекам, які падаў заяўку», — распавядае арганізатарка.
Дазвол ад берлінскіх уладаў атрымалі ў канцы студзеня 2026 года, пасля чаго пачала збірацца каманда з двух дзясяткаў чалавек — мастакоў, музыкаў і актывістаў, якія пазнаёміліся ў працэсе. Пры гэтым фінансавае пытанне стала самым складаным: у каманды не было зарэгістраванай структуры для збору данатаў у Германіі, таму частку выдаткаў удзельнікі пакрывалі з уласнай кішэні, а праз недахоп сродкаў праграму даводзілася змяняць на хаду. Актыўная фаза зборкі самога Цмока стартавала толькі ў красавіку, а першая паўнавартасная рэпетыцыя прайшла прама ў дзень парада на месцы збору.
Паганскія вайбы супраць паўднёваамерыканскіх пёраў
У адрозненне ад звыклай карнавальнай эстэтыкі з бразільскімі танцамі і яркімі пёрамі, беларусы вырашылі паказаць зусім іншую энергетыку — больш міфалагічную і фальклорную. Цэнтральным вобразам калоны стаў Цмок (вадзяны дракон), вакол якога аб’ядналіся каля 20 удзельнікаў у самастойна зробленых касцюмах вадзяніц і лясных істот.
Паколькі даты карнавалу супалі са святам Сёмухі, важнай часткай візуальнага коду сталі вянкі з жывых раслін і аўтарскія маскі з прыродных матэрыялаў. (У беларускай традыцыі Сёмуха — гэта час ушанавання продкаў, зеляніны, бярозавых галінак і вянкоў).
Таксама шэсце суправаджалася і музыкай: беларуская спявачка Валерыя Дэле адказвала за акапэльныя спевы і «абуджальную энергію голасу». Шэсце суправаджаў і дыджэй.
«Культурна карнавал — гэта Паўднёвая Амерыка, і ўсе прывыклі да пёраў, да танцаў. А ў нас усё выглядае абсалютна інакш. У нас іншая энергія і іншыя вайбы. Мы трохі разбавілі ўсё гэта вяселле сабой», — адзначыла Nata Ko.
Паводле слоў арганізатараў, галоўная мэта праекта — адкрыць замежнікам (ды і самім беларусам) нашу культуру з непалітычнага, глыбокага міфалагічнага боку, паказаўшы, што яна можа гучаць сучасна і самабытна нават на найбуйнейшых пляцоўках Еўропы.
Што такое Karneval der Kulturen?
Карнавал культур праходзіць у Берліне з 1996 года (саму арганізацыю заснавалі 30 гадоў таму, у 1996-м адбылося першае шэсце). Яго прыдумалі як адказ на рост ксенафобіі, каб паказаць адкрытасць і культурную разнастайнасць нямецкай сталіцы.
Сёлета фэст праходзіць з 22 по 25 мая ў мультыкультурным раёне Кройцберг (Kreuzberg). Кульмінацыяй заўсёды становіцца менавіта нядзельны вулічны парад, дзе розныя суполкі і арт-групы прадстаўляюць свае культуры.
Гэтае вулічнае шэсце штогод прыцягвае ад паўмільёна да мільёна гледачоў, што робіць берлінскі карнавал адной з самых масавых упэўненых падзей у Еўропе.
Падпісвайцеся на культурныя навіны Reform.news у Telegram
