Беларускі «Тэатр 21» паставіць у Вільні спектакль паводле Кафкі

Reform.news · 22 октября 2026, 19:47

https://reform.news/belaruski-tjeatr-21-pastavic-u-vilni-spektakl-pavodle-kafki/

Дванаццаць выпускнікоў ЕГУ разам з выкладчыкамі стварылі незалежны беларускі тэатр «Тэатр 21», першая прэм’ера адбудзецца заўтра — 23 кастрычніка.

Спектакль «Вяртанне галадара» — пераасэнсаванне апавядання Кафкі беларускім драматургам Сяргеем Кавалёвым. У яго інтэрпрэтацыі тэмы адзіноты, лёсу творцы і супрацьстаяння грамадству набываюць новыя адценні ў кантэксце гісторыі беларускага грамадства. Што адбываецца з мастацтвам, калі яно больш не патрэбнае гледачу? І што застаецца мастаку, калі на яго творы больш ніхто не глядзіць? Рэжысёр спектакля — Аляксандр Марчанка.

Спектакль пройдзе на беларускай мове ў будынку ЕГУ.

Тэатр стварылі дванаццаць выпускнікоў тэатральнай праграмы Еўрапейскага гуманітарнага ўніверсітэта (ЕГУ) і іх педагогі: Вольга Палевікова, былая кіраўніца Віленскага старога тэатра (раней — Рускі драматычны тэатр Літвы), і рэжысёр Аляксандр Марчанка.

«Патрэба займацца тэатрам разам аказалася мацнейшай за ўсе складанасці, з якімі мы сутыкнуліся. За час вучобы склалася група людзей, якім ёсць што сказаць адзін аднаму і гледачу. Нам неабходна асэнсоўваць тое, што адбываецца, шукаць сябе ў гэтым часе і казаць пра гэта са сцэны. Я ўпэўненая, што гэтая патрэба сугучная многім людзям», — рассказала Вольга Палевікова выданню Delfi.

Гісторыя «Тэатра 21» пачынаецца ў 2018 годзе. Тады ў ЕГУ з’явілася ідэя стварыць праграму ў галіне перфарматыўных мастацтваў, пазней яна атрымала назву «Тэатральнае мастацтва і акцёрская гульня». Меркавалася, што выпускнікі вернуцца ў Беларусь і будуць развіваць там сучасныя еўрапейскія тэатральныя практыкі, абапіраючыся на адукацыю і прафесійныя сувязі, атрыманыя ў Літве. Са слоў Палевіковай, падзеі 2020 года ў Беларусі істотна змянілі гэтыя планы, а поўнамаштабнае ўварванне Расеі ва Украіну ў 2022 годзе канчаткова разбурыла ранейшы сцэнар вяртання. Трэба было шукаць магчымасць працягваць прафесійнае жыццё маладых артыстаў за межамі Беларусі. Уласны тэатр стаў лагічным працягам распачатай адукацыйнай працы.

Мяркуецца, што тэатр будзе ставіць творы сусветнай і беларускай драматургіі, а таксама дакументальныя і паэтычныя спектаклі. Сярод тэм — жыццё паміж краінамі і культурамі, страх, нявызначанасць і права быць іншым.

Квіткі на спектакль можна набыць тут.

Падпісвайцеся на культурныя навіны Reform.news у Telegram