Беларускі мастацтвазнаўца і куратар Дзмітрый Салодкі падрыхтаваў да Праваслаўнага Раства адмысловую экскурсію па залах Нацыянальнага музея ў Варшаве — «Калядны сюжэт і Сандра Батычэлі».
Дзмітрый Салодкі — беларускі мастацтвазнаўца, куратар, лектар, які спецыялізуецца на гісторыі мастацтва, культуры, міфалогіі і этымологіі. Асаблівае месца ў даробку даследчыка займае вывучэнне сакральнага мастацтва.
6 студзеня лектар запрашае на адмысловую экскурсію, у цэнтры ўвагі — іканаграфія Раства як галоўнага свята Еўропы.
«Якія таемныя сэнсы хаваюць звыклыя нам персанажы? Як «чытаць» калядныя сюжэты, разумеючы кожны жэст і сімвал? Асаблівым момантам нашай сустрэчы стане знаёмства з жамчужынай калекцыі — сузіральным шэдэўрам вялікага італьянца Сандра Батычэлі», — анансуе новае выступленне даследчык.
Адзначым, што летась Дзмітрый Салодкі прачытаў цыкл анлайн-лекцый па гісторыі беларускага мастацтва для праекта Scholars for Belarus. Сярод тэм мастацтвазнаўцы былі: «Сармацкі міф: ад шляхецкага партрэта да тэатра смерці», «Помнікі беларускага мастацтва і іх культуралагічны кантэкст», «Спаса-Праабражэнская царква ў Полацку як культурны тэкст», у якой аўтар, у прыватнасці, раскрыў малавядомую гісторыю храма-рэлікварыума, аддаўшы ўвагу ідэям, праграме Прападобнай Ефрасінні Полацкай, закладзеных у Спаскую царкву XII стагоддзя.
Нагадаем, што Дзмітрый Салодкі быў куратарам даследчых праектаў у Нацыянальным мастацкім музеі Беларусі, такіх як «Чырвоны – код нацыі. Сакральнасць, эстэтыка, улада», «Чаму ты мяне пакінуў?», «Жаночы род». З 2023 года жыве ў Польшчы.
Час і месца правядзення лекцыі «Калядны сюжэт і Сандра Батычэлі»: 6 студзеня, 13.00, Нацыянальны музей у Варшаве. Рэгістрацыя тут.
Падпісвайцеся на культурныя навіны Reform.news у Telegram
