Беларуская артыстка новай хвалі CHORNABROVA анансуе рэліз свайго новага альбома «M.I.L.A.». Гэта яе першы праект, які ў роўнай ступені грунтуецца на польскай і беларускай мовах, ствараючы ўнікальны білінгвальны наратыў.
«M.I.L.A.» — гэта альбом пра тугу і новы пачатак. Пра пошук найменшых падабенстваў паміж месцам, да якога мы прызвычаіліся, і тым, да якога вымушаны прыстасоўвацца.
Гэта даследаванне відавочна і ў музычнай сферы: праз сінтэз польскага і беларускага фолку, хіп-хопу 2000-х і разнастайнага сэмплінгу артыстка стварыла гукавы ландшафт, які аднолькава рэзануе і з Мінскам, і з Варшавай.
Альбом запрашае слухачоў у падарожжа па мегаполісе, размаўляючы на яго мове: поліфанія сэмплаў, галасавых паведамленняў, радыёанонсаў і паўсядзённых размоў. Гэты тур з 12 трэкаў узбагачае польскую музычную сцэну голасам мігрантаў, які дзякуе гораду і адначасова крытыкуе яго.
«Мы выкарыстоўваем альтэр-эга, як MF DOOM ці Taco Hemingway, у якасці каталізатара гісторыі. Міла — гэта толькі частка нас, і мы спадзяемся, што кожны зможа знайсці ў ёй нешта блізкае сабе», — кажа мастачка і яе паплечніца Кэй.
Слухачы ўжо пачулі два сінглы: «Zimno» — гісторыю пра халодную Варшаву, так падобную на Мінск, і «Szkodniczka», дзе артыстка параўноўвае сябе з гарадской фаўнай: «Не кармі. Адпужвай. Расстаў пасткі… Мой акцэнт выклікае дрыжыкі».
Прэм’ера альбома — 6 лютага 2026 года. Канцэрт-прэзентацыя пройдзе 28 лютага ў варшаўскім клубе CHMURY.
Даведка: CHORNABROVA (Паліна Дабравольская) — вакалістка, кампазітарка, актрыса і тэатральная рэжысёрка. У Варшаве з 2021 года супрацоўнічала з Новым тэатрам, Драматычным тэатрам, Тэатрам Поўшэхны і MSN. Уладальніца шматлікіх міжнародных узнагарод, стыпендыятка Gaude Polonia 2025. Сузаснавальніца гурта Spievy. Свой сольны стыль (мікс альтэрнатыўнага хіп-хопу, фолку і поліфаніі) называе b-pop.
Дазнацца больш пра канцэрт і набыць квіткі можна тут.
Падпісвайцеся на культурныя навіны Reform.news у Telegram
