Прэзідэнт Украіны Уладзімір Зяленскі ў інтэрв’ю BBC заявіў, што працяглая аперацыя ЗША і Ізраіля супраць Ірана выклікае ў яго нядобрыя прадчуванні адносна перамоўнага працэсу з Расіяй.
«У мяне вельмі нядобрыя прадчуванні наконт уздзеяння гэтай вайны на сітуацыю ва Украіне. Фокус увагі Амерыкі — больш на Блізкім Усходзе, чым ва Украіне, на жаль. Таму вы бачыце, што нашы дыпламатычныя сустрэчы, трохбаковыя сустрэчы, пастаянна адкладаюцца. А прычына адна — вайна ў Іране», — сказаў ён.
Паводле слоў Зяленскага, прэзідэнт ЗША Дональд Трамп цяпер сканцэнтраваны на Іране. Аднак гэта не азначае, што перамоўныя групы сядзяць без справы.
«Перамоўныя групы паміж сабой размаўляюць. Наша група гаворыць з амерыканскім бокам кожны дзень. Я ведаю, што амерыканцы таксама размаўляюць з расіянамі кожны дзень», — дадаў ён.
Зяленскі таксама расказаў, што ЗША гатовы праводзіць трохбаковыя перамовы з РФ і Украінай на сваёй тэрыторыі, але Масква супраць.
«Амерыканскі бок з-за гэтай вайны ў Іране сказаў, што гатовы прыняць абодва бакі ў Амерыцы. Мы пацвердзілі свой удзел, але рускія супраць сустрэчы ў Злучаных Штатах Амерыкі. Таму мы пакуль спрабуем засяродзіцца на Амерыцы, прапаноўваючы дату і месца. Украіна падтрымае любую дату і любое месца, але дакладна не ў Расіі», — сказаў ён.
У Зяленскага таксама спыталі, ці робяць дзеянні Трампа свет больш небяспечным.
«У мяне не будзе справядлівага адказу на гэта. Я стараюся гаварыць аб’ектыўна, а не суб’ектыўна. Таму я мяркую, што любы раскол у НАТА аслабіць абодва бакі», — адказаў ён.
