Владимир Зеленский. Фото: t.me/V_Zelenskiy_official
Прэзідэнт Украіны Уладзімір Зяленскі пракаментаваў начныя ўдары ўкраінскіх беспілотнікаў па расійскіх аб’ектах. Паводле яго слоў, украінскія дроны пераадолелі каля 1000 кіламетраў да раёна Пецярбурга і нанеслі ўдары па арсеналах Ваенна-марскога флоту Расіі і базе ў Кранштаце. Таксама беспілотнікі пераадолелі каля 500 кіламетраў да Краснадарскага краю і атакавалі нафтабазу.
Украінскі лідар назваў гэта вынікам сумеснай працы Узброеных сіл Украіны, Службы бяспекі і Галоўнага ўпраўлення разведкі.
“Расіі трэба завяршаць сваю вайну і спыняць удары па жыцці. Любыя праявы несправядлівасці супраць Украіны атрымаюць справядлівы адказ”, — заявіў ён.
Нагадаем, 4 чэрвеня Зяленскі ў адкрытым лісце прапанаваў Пуціну правесці асабістую сустрэчу для завяршэння вайны ў нейтральнай краіне — Швейцарыі, Турцыі або адной з дзяржаў арабскага свету і ўключыць Еўропу ў працэс мірнага ўрэгулявання. Ён заявіў, што Украіна гатовая да поўнага спынення агню на час перамоў, да абмену ўсімі ваеннапалоннымі паводле прынцыпу «ўсіх на ўсіх», а таксама настойвае на вяртанні грамадзянскіх асоб і дзяцей, вывезеных падчас вайны.
Украінскі прэзідэнт таксама заявіў, што Кіеву вядома пра планы Расіі працягваць вайну да 2027–2028 гадоў і пра намер глыбей уцягнуць у канфлікт Беларусь. Ён папярэдзіў, што калі Пуцін асабіста не прыйдзе да рашэння завяршыць вайну, Украіна працягне змагацца.
Пуцін назваў ліст хамскім, заявіў, што не бачыць сэнсу сустракацца, і звярнуўся да расійскіх вайскоўцаў з заклікам «Працуйце, браты».