Жыхар Верхнядзвінскага раёна злавіў трох куніц капканамі і пойдзе пад суд

Рэдакцыя Reform.news · 11 сакавіка 2026, 14:59

https://reform.news/be/zhyhar-verhnjadzvinskaga-rajona-zlavi-troh-kunic-kapkanami-i-pojdze-pad-sud/

Жыхара Верхнядзвінскага раёна будуць судзіць паводле артыкула аб незаконным паляванні (ч. 2 арт. 282 КК) за здабычу трох куніц, паведамляе Следчы камітэт.

У снежні 2025 года 50-гадовы мужчына паставіў каля вёскі Новае Сяло чатыры капканы — тры на куніцу і адзін на бабра або выдру. Статусу паляўнічага і неабходных дазволаў у мужчыны не было.

Падчас першай праверкі ён знайшоў у капканах дзвюх куніц, зняў з іх шкуркі і забраў здабычу дадому. Пры наступным абыходзе абвінавачаны знайшоў трэцюю куніцу. Ён паклаў тушку ў заплечнік і адправіўся да ракі праверыць чацвёрты капкан. У гэты час мужчыну заўважылі супрацоўнікі інспекцыі аховы жывёльнага і расліннага свету.

Следства ўстанавіла, што ён паляваў без дазволу, правяраў капканы ноччу, што забаронена пры бяззбройным паляванні. На допыце мужчына растлумачыў, што не чакаў сустрэць у лесе людзей.

Шкода, нанесеная навакольнаму асяроддзю, ацэнена ў больш як 4400 рублёў. Абвінавачаны цалкам кампенсаваў яе.