Фото: Генпрокуратура
Суд Першамайскага раёна Віцебска прызнаў замежнага грамадзяніна вінаватым у арганізацыі незаконнай міграцыі, падробцы дакументаў і выкарыстанні падробленага дакумента (ч. 1 арт. 371-1 і ч. 1 арт. 380).
Як паведамілі ў пракуратуры, 29-гадовы мужчына з Паўднёвай Азіі ў складзе злачыннай групы паводле папярэдняй змовы з лютага па чэрвень 2025 года аказваў актыўнае садзейнічанне чатыром грамадзянам сваёй краіны ў незаконным уездзе і знаходжанні на тэрыторыі Беларусі. Паводле версіі абвінавачання, ён вырабляў падробленыя хадайніцтвы на атрыманне віз, асабіста сустракаў прыезджых у аэрапорце Мінска, адвозяў іх у Віцебск, браніраваў гасцініцы і хоспісы.
“Акрамя таго, ён з лютага па верасень 2025 года прыняў ад неўстаноўленага ўдзельніка злачыннай групы прапанову аб вырабе падробленай пячаткі — яна патрабавалася для фальсіфікацыі хадайніцтваў аб атрыманні беларускіх віз.
Характэрна, што падробленая пячатка была вырабленая на тэрыторыі яго роднай краіны і дастаўленая ў Беларусь кур’ерам, чарговым мігрантам, які прыбыў у краіну. Выкарыстоўваючы падробленую пячатку, абвінавачаны вырабіў яшчэ 14 фіктыўных хадайніцтваў для сваіх суайчыннікаў, аднак давесці свой намер да канца яму не ўдалося па незалежных ад яго абставінах”, — распавялі ў пракуратуры.
Падчас ператрусу ў мужчыны канфіскавалі падробленую пячатку, 59 гатовых хадайніцтваў аб выдачы віз, гарантыйныя лісты на знаходжанне замежных грамадзян у краіне, шматлікія фотаздымкі пашпартоў замежных грамадзян, а таксама перапіску з удзельнікамі злачыннай групы, у якой дэталёва абмяркоўваліся маршруты незаконнага перасячэння мяжы з сумежнымі дзяржавамі Шэнгенскай зоны.
У судзе мужчына прызнаў сваю віну. Яму было прызначана пакаранне ў выглядзе пазбаўлення волі тэрмінам на 1 год 3 месяцы са штрафам у памеры 200 базавых велічынь (9 тыс. рублёў).
Прысуд не ўступіў у законную сілу, можа быць абскарджаны і апратэставаны ў апеляцыйным парадку.