Сёння калегія Вярхоўнага суда разгледзіць апеляцыйную скаргу на завочны прысуд Пелагеі Корсакавай, асуджанай па артыкуле аб “здрадзе дзяржаве”, паведамляе праваабарончы цэнтр «Вясна».
У чэрвені Мінскі гарадскі суд завочна прысудзіў 27-гадовую Пелагею Корсакаву да 11 гадоў пазбаўлення волі. Яе бацькоў, Таццяну і Дзмітрыя Корсакавых, прысудзілі да 12 і 14 гадоў адпаведна. Акрамя таго, суд прызначыў сям’і штраф у памеры 50 тысяч рублёў.
Сужэнцаў абвінавачвалі па артыкулах аб “здрадзе дзяржаве”, незаконных дзеяннях з агнястрэльнай зброяй, боепрыпасамі і выбуховымі рэчывамі, а таксама незаконным перамяшчэнні праз мяжу зброі, боепрыпасаў і атрутных рэчываў. Іх дачку прызналі вінаватай у “здрадзе дзяржаве”.
Пелагея Корсакава з 2021 года жыве ва Украіне, дзе працуе графічным дызайнерам і каардынуе валанцёраў хуткага рэагавання, якія дапамагаюць пацярпелым пасля ракетных абстрэлаў.
Яе бацькоў, якія раней працавалі ў дзіцячым садзе, затрымалі ў верасні 2025 года. Паводле слоў Пелагеі, перад затрыманнем бацька патэлефанаваў ёй і паведаміў, што яго затрымалі, а маці нібыта трапіла ў бальніцу з інсультам. Пасля гэтага невядомы запатрабаваў ад дзяўчыны прыехаць у Беларусь, калі яна хоча дамагчыся вызвалення бацькоў. Пазней высветлілася, што Таццяна Корсакава ў бальніцу не трапляла.
Пелагея Корсакава лічыць прад’яўленыя сям’і абвінавачанні абсурднымі і звязвае крымінальны пераслед з тым, што яна жыве ва Украіне і падтрымлівала сувязь з бацькамі.
