У Міністэрстве абароны Беларусі заявілі, што ўручэнне позваў на ваенныя зборы за кароткі час да яўкі звязана з правядзеннем раптоўных праверак баявой гатоўнасці і не з’яўляецца арганізацыйнай памылкай.
На пытанне «Чаму позва на ваенныя зборы часта прыходзіць проста перад яўкай у ваенкамат?» адказала афіцыйная прадстаўніца ведамства Наталля Гаўрусік. Паводле яе слоў, асноўная мэта такіх мерапрыемстваў — ацэнка фактычнай гатоўнасці воінскіх часцей і ваеннаабавязаных, планы праверак загадзя не разгалошваюцца, а тэрмін апавяшчэння можа складаць менш за суткі.
“Па-першае, з-за раптоўнасці праверак баявой гатоўнасці. Галоўная мэта такой праверкі — ацаніць рэальны стан войскаў і гатоўнасць грамадзян да абароны Радзімы. Таму планы не разгалошваюцца загадзя, а час на апавяшчэнне мінімальны і можа складаць менш за суткі. Армія ацэньвае здольнасць грамадзян аператыўна з’явіцца, а часцей — хутка ўкамплектавацца, што немагчыма праверыць, калі папярэдзіць загадзя. Такім чынам, позва напярэдадні яўкі — гэта не арганізацыйная памылка, а запланаваны элемент праверкі баявой гатоўнасці”, – заявіла яна.
Адзначаецца, што паводле закона на час праходжання збораў за ваеннаабавязанымі захоўваецца сярэднямесячная заработная плата або выплачваецца кампенсацыя — у залежнасці ад формы ўласнасці працадаўцы. Кампенсацыі прадугледжаны і для беспрацоўных.
Раней у сацыяльных сетках з’явіліся скаргі грамадзян на тое, што ў некаторых выпадках позвы ўручаюцца за некалькі гадзін да ўказанага часу яўкі. Пры гэтым частка карыстальнікаў спасылалася на пастанову Савета міністраў, згодна з якой позва на зборы павінна быць уручана не пазней чым за 7 дзён да іх пачатку.
