Игорь Секрета. Скриншот видео
Намеснік міністра замежных спраў Беларусі Ігар Сакрэта заявіў, што трэція краіны прапаноўвалі пасрэдніцтва ў наладжванні кантактаў з Літвой. Мяркуючы па яго словах, Мінск адмовіўся ад такіх паслуг. Намеснік міністра даў каментар пасля сустрэчы кіраўніка беларускага ўрада Аляксандра Турчына з літоўскімі і польскімі перавозчыкамі, чые транспартныя сродкі не выпускаюць з Беларусі з восені мінулага года.
“З самага пачатку сітуацыі, якая ўзнікла чатыры месяцы таму, прадпрымалася маса спроб вырашыць гэтую праблему палітыка-дыпламатычнымі спосабамі. Спроб было зроблена незлічоная колькасць выйсці на сувязь з літоўскім бокам, прычым не толькі па лініі Мінск—Вільнюс, але таксама падчас знаходжання на міжнародных пляцоўках. Мы выразна падавалі сігналы, што гатовыя да размовы пра тое, каб абмяняцца думкамі.
Але чамусьці Вільнюс разглядаў і разглядае любыя кантакты на палітычным узроўні як сваю ўласную паразу. Мы абменьваліся гэтымі высновамі, здагадкамі з іншымі прадстаўнікамі іншых дзяржаў заходніх, але яны не разумеюць, у чым заключаецца параза. Калі ёсць праблема на мяжы, яе трэба вырашыць, і суседзі з гэтым справяцца, напэўна, наўпрост лепш за ўсё”, — сказаў Сакрэта.
Паводле яго слоў, былі краіны, якія выказвалі гатоўнасць выступіць у якасці пасярэднікаў.
“Больш за тое, я тут раскрыю некаторыя дэталі. Нават трэція краіны прапаноўвалі свае пасярэдніцкія паслугі. Але адказ наш быў такі: мы ж не ваюем, мы не разарвалі дыпадносіны, у нас ёсць агульная мяжа, якая павінна функцыянаваць нармальна. І вось гэты пасыл, ён гучаў ва ўсіх нашых заявах, інтэрв’ю, каментарыях.
Мяжа — гэта найскладанейшы палітычны і інфраструктурны механізм, які не працуе як прыватная лаўка: хачу адкрыю, хачу закрыю. Калі мы дамовіліся і заключылі пагадненне, то 24х7 павінна забяспечвацца прапускная здольнасць, павінен забяспечвацца належны рэжым аховы мяжы. І самае галоўнае, незалежна ад таго, якая сітуацыя ў нас, у нашых сталіцах павінны падтрымлівацца нармальныя працоўныя кантакты, якія спрыяюць таму, што бяспечна перасякаць мяжу могуць не толькі грамадзяне дзвюх краін, але і грамадзяне трэціх краін.
Я нагадаю, пацярпелымі тут выступаюць не толькі прысутныя палякі і літоўцы. Тут пацярпелі і грамадзяне многіх іншых краін, якія перавозілі грузы, дастаўлялі грузы, карысталіся гэтай мяжой і разлічвалі на тое, што яны заўсёды змогуць бяспечна праехаць праз тэрыторыю Беларусі і Літвы”, — дадаў ён.
У мінулым годзе Літва ў адказ на пачашчэнне залётаў метэазондаў кантрабандыстаў закрыла мяжу. Тады Аляксандр Лукашэнка даручыў сабраць грузавікі літоўскіх перавозчыкаў, размясціць іх на спецыяльных стаянках і спаганяць плату за стаянку. Пры гэтым ён прыгразіў канфіскаваць грузавікі. Раней літоўскія перавозчыкі заяўлялі, што чакаюць хуткага пачатку рэалізацыі гэтай пагрозы. Сёння Аляксандр Турчын заявіў, што беларускі бок не імкнецца канфіскоўваць транспартныя сродкі, а хоча дамовіцца.