Структуры МУС зоймуцца праграмаваннем і распрацоўкай сродкаў негалоснага атрымання інфармацыі

Міністэрства ўнутраных спраў Беларусі пастановай №41 ад 17 лютага пашырыла пералік платных паслуг, якія аказваюцца органамі ўнутраных спраў і ўнутранымі войскамі. Дакумент сёння апублікаваны на Нацыянальным прававым інтэрнэт-партале і ўступае ў сілу пасля апублікавання.

Пералік дапоўнены:

• паслугамі ў галіне камп’ютарнага праграмавання,
• паслугамі па распрацоўцы, вырабе, мадэрнізацыі і рамонце сродкаў негалоснага атрымання (фіксацыі) інфармацыі.

Цяпер у пераліку 27 пазіцый. Яны ахопліваюць шырокі спектр паслуг — ад удзелу ў кіназдымках да ветэрынарнай дзейнасці, уключаючы забавы, грамадскае харчаванне, прадастаўленне пражывання, перавозкі і г.д.