Амерыканскія вайскоўцы працягнуць прымаць меры па блакаванні перавозак венесуэльскай нафты. Адпаведнае ўказанне далі ў Белым доме. Пра гэта піша Reuters.
«Хоць ваенныя варыянты па-ранейшаму існуюць, асноўная ўвага надаецца, перш за ўсё, прымяненню эканамічнага ціску шляхам увядзення санкцый для дасягнення выніку, на які разлічвае Белы дом», — цытуе агенцтва ананімнага прадстаўніка амерыканскай адміністрацыі.
На яго думку, Венесуэла хутка сутыкнецца з сур’ёзнымі эканамічнымі наступствамі.
«Прадпрынятыя да гэтага часу намаганні аказалі велізарны ціск на Мадуру, і існуе меркаванне, што да канца студзеня Венесуэла сутыкнецца з эканамічнай катастрофай, калі не пагодзіцца пайсці на істотныя саступкі ЗША», — сказала крыніца агенцтва.
Тым часам амерыканскія вайскоўцы спрабуюць перахапіць трэці танкер, які загружаўся ў Венесуэле. Аднак пакуль гэта зрабіць не ўдалося. Берагавая ахова ЗША чакае прыбыцця дадатковых сіл для новай спробы.
Агенцтва таксама звяртае ўвагу на тое, што чыноўнік з Белага дома выкарыстаў слова «каранцін» замест «блакада», хоць «блакаду» раней выкарыстоўваў Дональд Трамп. Як піша Reuters, слова «каранцін» выкарыстоўвалася амерыканскай адміністрацыяй у мінулым стагоддзі падчас Карыбскага крызісу, калі Савецкі Саюз спрабаваў размясціць ракеты на Кубе.
«Мы назвалі гэта каранцінам, таму што блакада — гэта слова вайны», — казаў тады міністр абароны Роберт Макнамара.