Праект стварэння адукацыйнага цэнтра па падрыхтоўцы кадраў перспектыўных напрамкаў будзе дадаткова прапрацаваны. Такі вынік нарады ў Аляксандра Лукашэнкі, паведаміў сёння міністр адукацыі Андрэй Іванец. Раней ён параўнаў выпускнікоў такога цэнтра з «інтэлектуальным спецназам».
“На нарадзе ў кіраўніка дзяржавы ўсебакова былі разгледжаны пытанні па стварэнні новага адукацыйнага цэнтра, фактычна новага ўніверсітэта ў краіне, па падрыхтоўцы спецыялістаў у найбольш перспектыўных для нашай эканомікі галінах. Былі выказаны розныя пункты гледжання, шмат было за, шмат супраць. Таму нарада скончылася тым, што прэзідэнт даў даручэнне яшчэ раз дэталёва максімальна шырокім колам вывучыць дадзенае пытанне і ў найкарацейшыя тэрміны ўнесці прапановы ўрада кіраўніку дзяржавы”, — сказаў ён, перадае БелТА.
Паводле слоў Іванца, на нарадзе ўсе сышліся ў меркаванні, што стварэнне цэнтра трэба разглядаць у якасці нацыянальнага праекта. Ён адзначыў, што сённяшнія пераможцы алімпіяд, лаўрэаты спецфонду, выпускнікі дзіцячага тэхнапарка гатовыя «сямільнымі крокамі» асвойваць універсітэцкія праграмы.
“Для такіх хлопцаў мы павінны стварыць асаблівыя эксперыментальныя праграмы, якія будуць не толькі насычаныя сур’ёзнымі фундаментальнымі тэарэтычнымі ведамі, але, самае галоўнае, каб яны былі цалкам інкарпараваныя ва ўзаемадзеянне з рэальным сектарам эканомікі”, — сказаў міністр.
“Мадэль прапанаванага навучання прадугледжвае, што за першыя два гады студэнты дадзенага адукацыйнага цэнтра пройдуць усю праграму чатырохгадовага навучання ў традыцыйным ВНУ. Пачынаючы з трэцяга курса яны будуць працаваць у межах індывідуальнай формы навучання над канкрэтнымі праектамі і задачамі. Гэта з’яўляецца прынцыповым адрозненнем — праектна-даследчы прынцып арганізацыі вучобы”, — патлумачыў Іванец.