Папу Рымскаму Льву XIV трэба будзе перанесці аперацыю на лёгкім

Рэдакцыя Reform.news · 11 кастрычніка 2026, 16:19

https://reform.news/be/papu-rymskamu-lvu-xiv-trjeba-budze-peranesci-aperacyju-na-ljogkim/

Папа Рымскі Леў XIV паведаміў, што ў найбліжэйшыя дні перанясе аперацыю па выдаленні вузельчыка ў лёгкім, выяўленага падчас медыцынскага абследавання. Умяшанне запланавана ў клініцы Джэмелі ў Рыме на пачатак наступнага тыдня, піша Vatican News.

«Нядаўна, падчас шэрагу абследаванняў, лекары выявілі ў мяне абмежаваны вузельчык у лёгкім. Ён быў выяўлены на вельмі ранняй стадыі і добра лакалізаваны», – расказаў пантыфік пасля нядзельнай малітвы «Анёл Панскі» 11 кастрычніка.

Паводле яго слоў, лекары лічаць неабходным правесці аперацыю. Пантыфік вырашыў прытрымлівацца іх рэкамендацый і выдаліць утварэнне.

Дырэктар прэс-службы Святога Прастола Матэа Бруні удакладніў, што пасляаперацыйная шпіталізацыя павінна працягнуцца каля тыдня.

Пасля абвяшчэння пра аперацыю словы падтрымкі папу выказалі прадстаўнікі Каталіцкай царквы і італьянскіх уладаў. Старшыня Італьянскай епіскапскай канферэнцыі кардынал Матэа Дзупі заявіў, што царкоўныя супольнасці будуць маліцца за пантыфіка.

Прэзідэнт Італіі Серджа Матарэла перадаў Льву XIV словы падтрымкі ад імя жыхароў краіны.

«Ён зможа разлічваць не толькі на малітвы каталіцкіх вернікаў, але і на спачуванне незлічонага мноства людзей, як у Італіі, так і ва ўсіх кутках свету, незалежна ад таго, вернікі яны ці няверуючыя», – адзначыў ён.

Прэм’ер-міністр Італіі Джорджа Мелоні заявіла, што яе падбадзёрылі «спакой і супакаенне», з якімі Леў XIV абвясціў пра аперацыю.